Shillong, Jylliew 19 : U Myntri Rangbah Conrad K Sangma ha ka sngi Thohdieng, ula ong ba ka Jylla kala kyrpad ia ka Sorkar Pdeng ban weng noh ia ka jingbuh pud ba heh duh (ceiling) ha ki Externally Aided Project (EAP) na ka bynta ka Meghalaya ha kane ka samoi treikam ka 16th Finance Commission, haba pynpaw ba kane ka jingbuhpud ka “ktah ia ka jingtrei bha”.
Haba kren sha ki nongthoh khubor hadien ba ka Myntri Pla Tyngka ka Ri Nirmala Sitharaman kala buh ia u mawnongrim jong ki project EAP ba T.1,246 klur ha Meghalaya, u Myntri Rangbah ula batai ia ka tynrai jong kane ka jingbuh pud bala pynjari ha ka samoi jong ka Finance Commission bala dep.
“Ha ka Finance Commission bala dep, ha shiteng na kaba sdang ki kam, ka jingbuh pud kam shym la don satia na ka bynta ki Jylla ka thain Shatei Lam Mihhngi. Kumba nga la iathuh ha phi, 90% jong ka ram bala shim, la siew pat da ka Sorkar India” ula ong.
Ula bynrap ba namar katto katne ki Jylla, kynthup ka Meghalaya, kila lah ban ioh kham bun ki project, ka Finance Ministry hadien kala pyntreikam ia u pud (cap). “Kumta, ka Finance Ministry ka sngew ba ka dei ban buh da ka pud ba haduh katno ka Jylla ka lah ban shim. Kumta, nga la kren biria ia ka Madam ha kato ka por ba phi la dain kunai a ngi namar ka jinglah treibha hynrei ka ong “peit phim donkam ban hap siew biang, ngi hap siew ma ngi ia ka ram, kumta, ngin sa khmih ia baroh kine ki bynta” pynkynmaw u Conrad.
Ha ka jingpynbeit ba hashuwa, ka Meghalaya kala ioh ia u pud shim ram ba kot kumba T.3,500 klur. Ka Jylla, kala tam bun shah ia une u pud namar ka jingbiang ka rukom plan ia ki kam.
“Hynrei kumba phi iatip, haba bynrap lang ia baroh ki project ba ngi la lah ban pynioh kala kot shaka T.12,000 klur. Kane ka dei kaba ngi la trei shitom bad ngi la ioh ia kane ka pisa” ong u Myntri Rangbah.
Na ka bynta ka samoi treikam jong ka 16th Finance Commission, ka Jylla kala buh ia ka jingkyrpad ban weng noh ia kane ka jingbud pud.
“Mynta u snem ngi la kyrpad ba ka rukom bud pud kam dei shuh ban don na ka bynta ka 16th Finance Commission. Kumta, ka shong ha ka madam Finance Minister bad ka Sorkar India bad khamtam eh u Myntri Rangbah Duh ban rai halor kane. Ngi la dep buh ia ka jingkyrpad, ka jingkyrpad jong ngi ka long namar ba lada kam don ka jingbuhpud, ngin lah ban ioh kham bun” ula pynpaw.
U Conrad ula pynshai ruh ia ka rukom pynbeit ia ki jinglut pisa jong ki EAP haba pynpaw ba ki Jylla ki hap ban siew khyndiat eh.
“Haba kut ka sngi, ngi hap ban kynmaw ba ka Sorkar Jylla ka dang hap ban siew 28% jong katei ka pisa. Kumta, kam dei sayia kaba ngi lah ban shu shim khlem pud kat kaba ngi kwah. 72% la siew biang lane siew da ka Sorkar India katba 28% ka wan na ka Sorkar Jylla. Kumta, ngi donkam ia ka bor ban lah siew pat ia katei ka 28%” ula ong.
 ha ki Externally Aided Project (EAP) na ka bynta ka Meghalaya ha kane ka samoi treikam ka 16th Finance Commission, haba pynpaw ba kane ka jingbuhpud ka “ktah ia ka jingtrei bha”.){kind=link}