Shillong, Rymphang 20: Ka Voice of the People Party (VPP) hynne ka sngi kala pyllait paidbah ïa 34 tylli ki mat jingkular lane ka Manifesto na bynta ka ilekshon 2023 ka ban long haka 27 tarik mynta u bnai.
Haba pyllait ia kane ka Manifesto u president ka VPP u bah Ardent Miller Basaiawmoit ula pyntip ba ki don haduh 34 tylli ki mat bad kiba hakhmat eh napdeng kine ki mat ki kynthup ban kyntiew iaka pule puthi, ka koit ka khiah, ka rep ka riang, ban bishar biang iaka MoU, ban iada iaka khyndew ka shyiap, ka jingpynmih ïa ki sor rit ha marjan bad ka nongbah Shillong ban lait naka jingkhapngiah, ban kyntiew iaka jngohkai pyrthei, ban pynkhlain ban pynmih bording, ban pynkhuid ia ka thung kam thung jam bad kiwei kiwei de.
Haba pynshai halor ka jingdawa pyntreikam iaka Inner Line Permit (ILP) u bah Ardent ula ong ka jingslem iaka Meghalaya ban ioh ILP kadei hi namar ka jingbym shim khia ka sorkar jylla ban pynbor iaka sorkar pdeng halor kane ka mat.
U bah Ardent ula kynnoh ba ka sorkar synroplang ka Meghalaya Democratic Alliance (MDA) kala pynkulmar paidbah bad kala pynmih iaki jyrwit jyrwat haba iadei bad ka jingdawa ILP naka sorkar pdeng bad ka jingmynjur iaka Resolution kadei tang ka jingpynbeij iaki paidbah ka jylla.
“Ka jingmynjur iaka Resolution daka ïng dorbar thaw ain ka jylla ban dawa ILP kadei tang ban pynthanda iaka jingiakhih kaba la jur bha ha kylleng ka jylla bad ka sorkar jylla kam shym la shimkhia halor kane ka jingdawa” la kynnoh u bah Ardent.
U bah Ardent ula ong ba ka shong sa ha ki paidbah ban buh jingkylli iaka sorkar jylla, la ka mut shisha ne em ban pyntreikam ILP hapoh Meghalaya bad ka shong hi ha ki paidbah ban ai jingsneng ia ka sorkar bad ia kino kino ki Party kiba ialehkai ia kane ka mat kaba ki paidbah kila angnud mynta la bun bun snem.
Ula bynrap ba ha ka jingshisha kam donkam iaka ïng dorbar ban rah syndon daka Resolution naka bynta ban pyntreikam iaka ILP hynrei kadei ban iakhun tyngeh pyrshah iaka sorkar pdeng ban weng noh iaka hukum u president daka weng noh iaka kyntien Khasi-Jaintai naka Preamble jong ka Bengal Eastern Frontier Regulation Act 1872.
Haba iadei bad ka jingpyntreikam iaka Meghalaya Residents Safety and Security Act (MRSSA), u bah Ardent ula kam ba kino kino ki sorkar kim lah ban tehlakam iaka jingwan rungkyrthlep ki bar ri tang da kawei ka ain hynrei donkam ban pyntreikam ruh da kiwei ki ain kiba iahap bad ka juk mynta halor kane.
Nalor kane u president ka VPP u bah Ardent ula pynrem ruh ia kiwei ki sengsain pyrthei kiba khlem kynthup iaka ILP hapoh ki Manifesto da ka ba ong ba kane ka paw shai ba kim don shisha ka jingkitkhlieh ban pyntreikam iaka ILP.
