Shillong, Rymphang 20: U Nongialam ka seng Congress u Gaurav Gogoi ula ther tyngeh ia u Myntri Rangbah ka Assam u Himanta Biswa Sarma halor ka jingthet kti ba dei ma u uba pynwan dur ia ka sorkar Meghalaya Democratic Alliance (MDA) bad ba ka BJP ruh kadei kaba don bynta naduh ba sdang haduh ban da kut ha ki jingkynnoh kam bamsap ha kane ka Sorkar.
“Baroh ki tip, kumno la thaw ia ka sorkar ha Meghalya ha kaba ka BJP kala don ia ka bynta kaba khraw bad baroh ki tip ia ka jingiadei kaba iajan hapdeng u Himanta Biswa Sarma bad u Conrad Sangma bad kumno la pynlong ia u (Conrad) kum u Myntri Rangbah ka Meghalaya. Mynta u Sarma ym lah ban thetkti ialade ba ka BJP kam don byntalang bad ka sorkar MDA” ong u Gogoi haba iakren bad ki nongthoh khubor hynne ka sngi.
Une u nongialam ka seng Congress ula ong, ba ka BJP kam lah ban kynnoh thik tang iaka seng NPP halor ka jingbym larkam ka sorkar MDA ban ai jingshakri ia u paidbah ka Meghalaya namar ka BJP kala don bynta ha kaban thaw ia ka sorkar MDA bad Ar ngut ki MLA ka BJP kiba kynthup ia u Bah Sanbor Shullai bad u Bah AL Hek kila bat kum ki Myntri Sorkar. Ula ong ba ka BJP kadei ban sangeh shi syndon iaka jingleh drama ban ialam bakla ia ki paidbah ka jylla Meghalaya.
Ula ong, ka seng NPP, BJP bad kiwei pat ki seng kiba don haka sorkar MDA kidei kiba donkti lang ha ki kam bamsap naduh ka jingkhyllem ka Dome jongka Assembly, ka jingbam sap naka khlam COVID-19, ka jingbamsap Saubhagya Scheme, bad kiwei kiwei bad baroh kitei ki seng sain pyrthei kiba don lang bad ka sorkar MDA kidei kiba iatreilang ha ki kam bamsap.
U Gogoi ula ong, ba u Myntri Kam Pohiing ka ri u Amit Shah ha ki snem kiba la dep, ula kam ha ki jingialang ha Delhi, ba ka BJP kala knieh ia u lakam synshar na ka Congress ha ka jylla Meghalaya bad ia ka sorkar kaba thymmai ha Meghalaya la thaw da ka BJP, hynrei mynta haba ka elekshon kala jan une ujuh u briew ula kam pat ba ki kam bamsap kiba jia ha ka sorkar Meghalaya kadei kaba la ialam da ka seng NPP bad kren kumba ka BJP kam don lang ha ka sorkar MDA ha ki kam ban lute na ki paidbah ka jylla.
Ula ong, ka BJP kala shu pyndonkam ia u Conrad K Sangma ha kine ki san snem kiba la leit bad mynta haba kam donkam shuh ia u, kala bret noh ia u sharud.
Ula ong, ki paidbah kila tip lut ia kiei kiei baroh bad kin sa ai iaka jubab kaba paka haka elekshon MLA ia ki seng sain pyrthei kiba don haka sorkar MDA. Ula ong ba ki paidbah ka Meghalaya ki kwah ba iaka sorkar jylla dei ban pyniaid na Shillong ym na Dispur da u Himanta Biswa Sarma uba shah pyniaid kylla ha u Myntri Kam Pohiing ka ri u Amit Shah uba don ha Delhi.
