Shillong, Risaw 17: U Myntri Sorkar uba long ruh u MLA ka Mylliem, Bah Hamletson Dohling hynne ka sngi nyngkong, u la plie paidbah ia ka iing shnong Maweitnai, Mylliem.
Na ka liang u MLA ula ai khublei ia ka shnong bad kyrpang ia ka VEC Maweitnai kaba la pyntrei hok ia ka kam ba la bynshet ha ki. Ia katei ka iing la tei hapoh ka Bharat Nirman Seva Kendra (BNSK), kaba hap hapoh ka scheme MGNREGA.
U Bah Hamlet u kyrmen skhem ba kane ka iing shnong ba thymmai kan wanrah ia shibun ki jingmyntoi na ka bynta ka shnong hi baroh kawei, ha kaba ki prokram kum ki jingialang, ki jingai jinghikai bapher bapher, ki health camp bad kiwei ki jingdonkam ki lah ban pynlong hapoh kane ka iing.
Ha kane ka sngi la iadon lang ruh U Bah P T Passah, Project Director, DRDA, Bah Andrew Myrthong, BDO, Mylliem C&RD Block, ki dkhot jong ka Dorbar Shnong Maweitnai bad kiwei kiwei.
