Shillong, Risaw 17: U MLA ka Mawsynram Bah HM Shangpliang bad ki Nongialam ka Seng Khasi ka thain, kila dawa na ka sorkar jylla ba kan bhah tyngka lem na ka bynta ban tei iaka Seng Khasi Hall ha Mawsynram.
Ha katei ka jingialang ki 17 tylli ki kynhun jong ka Seng Khasi, kila aiti iaka dorkhas ha u Commissioner and Secretary ka tnad Arts and Culture Bah FR Kharkongor ha ryngkat ka jingdonlang kiwei kiwei ki heh ophisar sorkar.
U Bah Shangpliang ula ong ba kum u MLA u ai ka jingkyrshan iaka jingdawa jong ka Seng Khasi ban ialeh ban pynneh pynsah iala ka dustur bad iala ka tynrai.
“Nga la kyrpad iaka sorkar ban pynbna bad bhah tyngka ia kitei ki projek bad ka jingwan ai dorkhas ka jong ki kan ym long kaba lehnohei” ula ong.
U Bah Shangpliang ula ong ba ka jingkyrpad ka long ban pyntreikam ia ki 17 tylli ki projek kiba kynthup ban tei iaka Seng Khasi Hall, Conference Hall bad ki jaka leit shabar.
Ula ong, ba ka kynhun kala pynpaw iaka jingdonkam ban tei iaka Seng Khasi Hall ban pynlong iaka lehniam leh rukom man la ka snem khamtam haba ka thain Mawsynram kadei kaba jur slap bha.
“Ngi la kyrpad ban mang pisa lem ia kine ki jingtyrwa bad na ka liang u Commissioner Secretary ula pdiang iaka jingpynsngew bad ula pynthikna ban khmih bniah ia kitei ki jingtyrwa ban phah iaki ophisar ba kin leit jurip ruh ia kitei ki jaka” ong u Bah Shangpliang.
