Shillong, Risaw 17: Ka Hynniewtrep Integrated Territorial Organisation (HITO) kala ai ia ka jingkyrshan ba pura ia ka jingdawa “Garoland” jong ka Garoland State Movement Committee (GSMC) haba dawa ruh ban pynkha ia ka Khasi State kat kum ka Instrument of Accession (IOA) bad ka Annexed Agreement (AA).
U President ka HITO Bah Donbok Dkhar ha ka kyrwoh, ula kyntu ruh ia baroh ki seng sain pyrthei ka Jylla ban kren shai halor ka nongrim jong ki, haba phai sha kane ka kam.
“Ka HITO ka ai ka jingkyrshan ia ka Council ki Nokma halor ka jingdawa ban ai ka jingithuh kyrpang bad kiba dei shibynta jong ka Grand Council of Chief of Meggalaya ba kynthup ia ka Federation of Khasi State namar ka jingdawa Khasi State, kat kum ka IOA bad AA bala iasoi bad pdiang da u Governor General ka India ha ka 17 tarik Nailar, 1948” ong u Bah Donbok.
Une u Nongialam ka HITO ula ong ruh “Ka jingdawa Khasi State ka kynthup ia 54 tylli ki Hima/Elaka bad 19 tylli ki Elaka ha Ri-lum Jaintia ba kynthup ia ki Shnong Khasi, ki jaka jong ki Hima kiba don mynta hapoh ka Jylla Assam bad Bangladesh”.
Haba ai nuksa ia ka jingpynkha ia ki Jylla thymmai na ki Jylla kiba heh, u Bah Donbok ula ai nuksa ia ka jingioh Jylla ka Meghalaya ha u snem 1972 bad ka Arunachal Pradesh bad Mizoram ha u snem 1987. Ula ong ruh ba ha u snem 2000, ka Chattisgarh, Uttaranchal (bala pynkylla kyrteng sha ka Uttarakhand ha u 2007) bad Jharkhand ki dei kiba la phiah na ka Jylla Madhya Pradesh, Bihar bad Uttar Pradesh.
U Bah Donbok ula ong ruh ba ka Telangana ka dei kaba la phiah na ka Andhra Pradesh ha u snem 2014 bad ha u Risaw 2019 pat la phiah ia ka Jammu & Kashmir bad ka Ladakh.
“Namar kata, ngi don jingkyrmen ba ka lynti ka don ban ioh thymmai ia ki territories bad ki Jylla hapoh ka Ri.
“Namar kine ki jingkylla baroh, mynta ngi la don 28 tylli ki Jylla bad 9 tylli ki Union Territories. Kane ka dei ka nongrim ban pynkha biang ia ki India ha India” ula ong.
