Shillong, Jylliew 04 : U Myntri Rangbah ka Jylla Conrad K Sangma ha ka sngi Balang ula pyntip ba ka Sorkar Jylla kala peitthuh bha ia ka jingsaphriang ka khlam sniang African Swine Flu bad kala shim ia ki sienjam ban tehlakam, haba pynpaw ba kane ka khlam ka dei kaba ju jia man ka por Meghalaya.
“Ha ka jingshisha, kane kala long ka jingeh ha ki snem bala leit noh bad ngi la peit thuh bha ia ka jinglong jingman bad ngi la shim ia ki sienjam ban tehlakam ia ka” ong u Conrad haba iakren bad ki nongthoh khubor.
Haba pynpaw ia ka jingsngewkhia, u Myntri Rangbah ula ong ba kum kine ki jinglong jingman ki mih na ka por sha ka por hynrei ula pynthikna ba ki lad jingiada kila don.
“Hooid, ki don ki jingsngewkhia bad kine ki jingsngewkhia ruh ki iai jia na ka por sha ka por hynrei ka Tnad kala shim ia baroh ki lad ki lynti bad ki sienjam ban pynthikna ba kane ka khlam kan ym saphriang kylleng” ula ong.
U Conrad ula bynrap ba tang katto katne tylli ki jingiohpang ki sniang la pyntip haduh mynta. “Ki don katto katne ki sniang kiba iohpang bad ngin leh kat kaba lah ban pynthikna ba kane ka khlam kan ym saphriang ha baroh kawei ka Jylla” ula ong.
