Shillong, Jylliew 03 : U Myntri kam Pohiing ka Ri Amit Shah un wan poi h Shillong ha ka por 9 baje jong ka miet sngi Balang ban pyniaid ia ka North Eastern Council’s Plenary session ba shisien shisnem la sngi Palei, pyntip u Myntri Rangbah ka Jylla Conrad K Sangma.
“Ka jingialang ka NEC kumba phi iatip ba ka dei ka kam ba manla u snem bad u Chairmen bad Myntri kam Pohiing ka Ri Amit Shah un sa wan poi mynta ka miet” ong u Conrad haba iakren bad ki nongthoh khubor.
“Lashai ka sngi ka dei ka jingialang kaba kongsan eh jong ka NEC” ula ong haba pyntip ba baroh ki Myntri Rangbah bad ki Lat jong ki phra tylli ki Jylla ka thain Shatei Lam Mihngi kila wan ban iashimbynta.
U Conrad ula ong “Nga thikna ba ngin ioh ia ka jingialang kaba tei” haba pyntip ba ki mat ba hakhmat eh jong ka jingialang kan long ki kaiphod na ki Task Force bapher bapher bala thung da ka DoNER Ministry.
“U Myntri ka DoNER ula thung ia ki Task Force ha ki kam bapher bapher na ka bynta ka thain Shatei Lam Mihngi bad u kwah ba baroh ki Jylla kin iatreilang” ong u Conrad.
Ula iathuh ba ka kam jngohkai, ki samla, ka khaii pateng bad ki jingtei ki dei ki kam kiba don ia ki Task Force bala khlieh hi da ki Myntri Rangbah bad kiwei ki Dkhot. “Nga peit ma nga ia ka Task Force halor ki kam jnghkai bad ngin sa ai kaiphod lashai ka sngi” ula ong.
U iathuh ba kiwei kiwei ki mat iakren ruh kin sa don ia kiban wanrah hi da ka SorkarPdeng. “Nalor kitei ki mat, kin don ruh kiwei ki mat kiba u Myntri kam Pohiing bad u Myntri ka DoNER kin sa wanrah bad kine baroh ngin sa tip lashai ka sngi” ong u Myntri Rangbah.
U Conrad ula pyntip ruh ia ka jingwan jong ki Nongialam na Delhi sha Jylla ha ki sngi ban wan. “U JP Nadda un sa wan ha ka 5 tarik Jylliew sha Meghalaya…kane ruh ka long kaba kongsan bha” ula ong haba bynrap “Ngin sa ioh ruh ia ka Myntri Pla Tyngka ka Ri ka ban sa wan hakine ki 10 sngi ban wan sha Shillong. Kane ruh ka long kaba kongsan bha ia ngi”.
U Conrad ula pynthikna ia ka jingleit iashimbynta jong u ha ka jingialang ban wan jong ka NITI Aayog. “Ngin sa don ka jingialang jong ka NITI Aayog ha kaba u Myntri Rangbah Duh un sa pyniaid ia ka jingialang bad baroh ki Myntri Rangbah ki Jylla jong ka Ri, ka ban long ha ka 11 tarik Jylliew. Nga ruh ngan leit sha kane ka jingialang”.
