Shillong, Jylliew 03 : Ka kynhun synrop Meghalaya Democratic Alliance (MDA-II) kala rai ban phah ia u Myntri barim ka Sorkar Jylla James PK Sangma sha Rajya Sabha hadien ba ki seng sain pyrthei ba iatreilang ha ka kynhun synrop, kila kyrshan ia u kum u kyrtong sha kane ka Iingdorbar Parliament.
Ia kane ka rai la shim ha ka jingialang jong ka kynhun synrop MDA-II ba long ha ka sngi Balang ha State Guest House ha Shillong. Ka kynhun synrop kala mynjur ban pynieng ia u James Sangma kum u kyrtong na ka bynta ka samoi treikam ba hynriew snem ha Rajya Sabha.
Ia u MP ka Rajya Sabha na Meghalaya yn sa jied da ki 60 ngut ki MLA ne dkhot ka Iingdorbar Thaw Ain ka Jylla. Namar ba ka MDA-II kaba don ha Liang Synshar, ka dei kaba don bun paid eh hapoh ka Iing, la khmih lynti ba u kyrtong ka MDA yn ioh ia ka jingjop kaba suk.
Ia ka elekshon la buh ban pynlong ha ka 18 tarik Jylliew bad ka sngi thep kyrteng ba khatduh jong ki kyrtong kan kut ha ka 8 tarik Jylliew.
Haba pynbna ia kane ka rai, u Secretary ka MDA Parliamentary Party Bah Paul Lyngdoh ula ong ba bunki paralok ka kynhun synrop kila tyrwa ia ka kyrteng ban iapyrkhat. Hynrei, namar ym shym la mih ka jingmynjur ia u kyrtong ba iamon lang, ka kynhun synrop kala rai ban bud ia kaei kaba ju leh kata ban kyrshan ia u kyrtong ba jied da ka paralok ba don bun paid eh.
Namar kata, ka kynhun synrop kala jied da kawei ka sur ban phah ia u James Sangma jong ka National People’s Party (NPP) kum u kyrtong shaka shuki Rajya Sabha.
U Chairman ka MDA bad Myntri Rangbah ka Jylla Conrad K Sangma u iathuh ba u James Sangma un sa leit thep kyrtenp ha ka 5 tarik Jylliew ha ka por 2:30 baje janmiet.
U Myntri Rangbah Conrad K Sangma ula ong ba kane ka jingialang kala iakren tang ia kawei ka mat bad aikhublei ia ki dkhot halor ka jingiatylli. Haba batai ia ka rai, u Conrad ula ong ba ki jingiakren kiba bun kim shym la pynmih ia ka jingiamynjur lang.
“Ka jingiakren kaba bniah kala mih bad dei na kata ka daw, ngi la shim por hynrei haba kut namar ba ngim lah ban poi sha ka jingiamynjur lang halor ki jingkwah bapher bapher jong ki seng sain pyrthei bapher bapher, ngi la mynjur lang noh ba ngin iaid kat kum ka lynti synshar paidbah ban kyrshan ia u kyrtong jong ka party kaba bun paid eh” ula ong.
U Conrad u iathuh ba baroh ki seng sain pyrthei kiba don ha ka MDA kila iasoi ia kane ka rai.
“Baroh ki seng sain pyrthei kiba iadon mynta ka sngi, kila ai ka jingmynjur ia kata bad kumta, ka jingkylli ban buh ia u whip kam mih satia” ong u Conrad.
U Conrad ula pynshai ia ka rukom long ka jingjied ia u kyrtong. “Ka long kaba kongsan ban pynpaw ba u kyrtong uba ngi la tyrwa mynta um dei u kyrtong ka seng sain pyrthei hynrei uba la rai kum u kyrtong ka MDA-II”.
Haba iadei bad ka elekshon shiteng samoi ka Shillong Lok Sabha, u Nongialam ka UDP Parliamentary Party Bah Paul Lyngdoh ula iathuh “Ka jingialang kala mynjur da kawei ka sur ba ki seng sain pyrthei ki long laitluid ban iakhun/kyrshan/ nym iashah iano iano ruh/kiar na kane ka elekshon shiteng samoi”.
 kala rai ban phah ia u Myntri barim ka Sorkar Jylla James PK Sangma sha Rajya Sabha hadien ba ki seng sain pyrthei ba iatreilang ha ka kynhun synrop, kila kyrshan ia u kum u kyrtong sha kane ka Iingdorbar Parliament.){kind=link}