Shillong, Risaw 19 : U MLA ka BJP na Nongpoh Bah Mayralborn Syiem ha ka sngi Palei ula bthah ia u President ka Meghalaya Pradesh Congress Committee (MPCC) ban pynbeit shuwa iala ka jong ka iing ka sem hadien ba u Bah Pala ula kynthoh ia ki MLA barim ka UDP ba iasoh BJP ba kin sa mad ia kajuh ka nusib kumba jia ia ki MLA ba iasoh TMC.
Haba pynpaw ia ka jingsngew skhem ban jop biang kum u MLA ka Nongpoh, u Bah Mayral ula ong ba man ki elekshon ki long kiba eh bad ki nongthep vote ki rai halor ki kam bala leh.
“Man ki elekshon ki dei kiba eh. Ha u 2018 haba nga jop na ka Congress ka long kaba eh bha, 2023 na ka UDP ruh ka long kaba eh bha. Ki paidbah ki ai ia ka rai halor ka jingshakri bad ka kam bala leh na ka bynta ka constituency” ula ong.
“Ki paidbah kin vote na ka bynta ki briew kiba trei na ka bynta ka jingmyntoi jong ka constituency” bynrap u Bah Mayral.
“Da kaba burom ia u President ka MPCC, u dei ban peit iala ki jong ki briew bad pyrshang ban lum iala ki briew hashuwa ban kdew kti ia kiwei. Ngam don eiei pyrshah ia ka Congress. Nga burom ia baroh ki seng sain pyrthei” ong u Bah Mayral.
Ula bynrap “Nga dei u shipai bar it ha ka duriaw kaba heh jong ka jylli sain pyrthei. Ngin shakri naduh ka mynsiem bad kyrmen ba ki paidbah kin kyrshan ia ngi ynda dei ka por”.
