Shillong, Risaw 29: U MLA ka BJP na Nongpoh constituency bah Mayralborn Syiem u la ong ba ki 8 ngut ki MLA barim ka UDP kim don kano kano ka jingbym sngewtynnad ia ka UDP bad ka jingpyniasoh sha kawei pat ka party ka dei ka rukom ba ju long ha ka synshar paidbah.
“Ngim don ei ei pyrshah ia u President ka UDP, ne ia ki nongkitkam jong ka Party baroh kawei. Ngi kitbok kitrwiang ia ki baroh. Ha ka synshar paidbah ka don beit ka jingiarung iamih na kawei ka party sha kawei pat” ong u Bah Mayralborn.
Da kaba kdew ia ka histori, u la ong, “Ha u snem 1972 ka APHLC ka la jop 32 tylli ki seat hynrei shuwa ka ilekshon 1978 ki la iasoh bad ka Congress hapoh ka jingialam jong u Capt W.A. Sangma. Kumta ka jingiasoh bad pyniasoh bad kiwei ki party ka long kaba iai bteng ha ka sain pyrthei.”
Halor ka daw ba um shym la pyniasoh sha ka NPP kum kiwei pat ki nongthaw ain ka Ri-Bhoi, u bah Mayralborn u la ong, “Kylli ia ki nongialam ka NPP. Ngam lah ban kren eiei halor ki kam jong ka NPP. Nga lah ban ong tang shaphang ka BJP ha kaba ngi ngeit skhem ban jop ia ka jingbun paid ha ka ilekshon 2028”
Haba kylli kumno un ialeh pyrshah ia ka jingkynnoh ba don ka ain Hindutva haka BJP, u MLA u la ong, “Ha Meghalaya kam don kano kano ka polisi Hindutva. Ngi iakhun na ka bynta ka roi ka par, ka jingshngain jong ki kynthei, ka jingbym don kam bad ki nongrep. Kine ki dei ki mat ba kongsan na ka bynta ka ilekshon ban wan.”
