Shillong, Risaw 29: Ka Director ka Health Services kong C Iangrai ha ka sngi Palei kala ong ba ka Sorkar Meghalaya ka la shimkhia ban pynthikna ba baroh ki khynnah kynthei kiba lah bit bad ki bahaïing jong ki kin ïoh ïa ki jingtip bad ka jingkyrshan kiba donkam, khnang ba kin lah ban shim ïa ki rai kiba dei halor ka jinginjek tika HPV.
“Ka Meghalaya ka la shimkhia ban pynthikna ba baroh ki khynnah kynthei kiba lah bit bad ki bahaïing jong ki kin ïoh ïa ki jingtip bad ka jingkyrshan kiba donkam, khnang ba kin lah ban shim ïa ki rai kiba shai bad kiba dei halor ka jinginjek tika HPV. Na ka bynta ban pynurlong ïa kane, donkam ïa ka jingïatreilang kaba ïaid ryngkat hapdeng ki tnad ka koit ka khiah, ka pule puthi, ka Meghalaya State Rural Livelihoods Society (MSRLS) bad ka tnad Social Welfare, ryngkat bad ka jingïashim bynta kaba khlaiñ jong ki skul bad ki shnong ki thaw. Ka jingïatreilang jong ngi bad ka Girl Effect India lyngba ka prokram Teeka Talk kan iarap ban pynkhlaiñ ïa kine ki jingpyrshang bad ban pynpoi ïa ki jingtip kiba shaniah sha ki longïing,” ong ka kong Iangrai.
Ka kong Iangrai kala kren ïa kane ha ka jingïalang ban plie paidbah ïa ka prokram ‘Teeka Talk’ — kaba dei ka sienjam ban ai jingkyrshan ïa ki kmie ki kpa, ki samla bad ka imlang sahlang da kaba pynbiang ïa ki jingtip kiba shaniah halor ka jingai injek tika HPV bad ki lad jingïada na ka jingpang bampong ka kpoh (cervical cancer).
Ïa kane ka prokram la sdang da ka tnad ka koit ka khiah ha ka jingïatreilang bad ka Girl Effect India, katba ka Indian Social Responsibility Network ka long ka kynhun kaba pyntreikam ïa ka. Ka thong jong ka prokram ka long ban pynkhlaiñ ïa ka jingpynsngewthuh bad ka jingïashim bynta jong ki paidbah halor ka jinginjek tika HPV ha baroh kawei ka jylla.
Ha kane ka jingïalang la wan ban ïashim bynta palat 35 ngut ki nongmihkhmat na ki tnad ka koit ka khiah, ka pule puthi, ka Social Welfare bad ka MSRLS.
Ka Sorkar ka ai ei ïa ka injek tika HPV sha ki khynnah kynthei kiba la dap 14 snem ka rta ha ki jaka ai jingsumar jong ka Sorkar. Ka jinginjek tika HPV ka lah ban ïarap ban ïada na ki jingpang HPV kiba wanrah ïa kiba bun na ki jingpang bampong jong ka trai kpoh. Katkum ki jingtip jong ka NCRP-ICMR na u snem 2024, ka cervical cancer ka dei ka jingpang cancer kaba wan ha ka kyrdan kaba ar na kiba kham jyllei hapdeng ki kynthei ha India, ha kaba la don 78,499 ngut ki kynthei kiba la thuh ba ki don ïa kane ka jingpang, bad 42,392 ngut ki la duh ei ïa la ka jingim.
Ka prokram Teeka Talk ka pynkhlaiñ ïa kine ki jingpyrshang lyngba ka jingïashim bynta jong ki skul, ki shnong ki thaw bad ki longïing, ryngkat bad ka chatbot lyngba ka WhatsApp kaba ai ïa ki jubab kiba shai bad kiba lah ban shaniah halor ki jingkylli kiba ju mih.
U Joint DHS u B R Marak u la kyntu ia ki kmie ki kpa ban ai injek mardor ia ki khun kynthei.
Ka Country Director jong ka Girl Effect India ka Kavita Ayyagari ka la ong ba da ka jinglong tynrai ki kmie ki kpa ki don ki jingkylli halor ka jingshngain bad ki jingmyntoi.
