Itanagar, Naitung 20: Ia ka leit ka wan jong ki 19 ngut ki nongtrei bylla ki ba dei na Assam ki bala jah rngai noh naduh kane ka taiew ba la lah hajan khappud ka India-China hapoh Kurung Kumey district jong ka Arunachal Pradesh ym pat shym la lapdien satia kat haduh mynta, ong ka khubor heh pulit hynne ka sngi Balang.
Na ka liang u Deputy Commissioner ka Kurung Kumey district u Bengia Nighee u la ong ba ki la phah ia ki sorkar bad heh pulit jong ka district sha Dmin ban ioh jingtip ha ka ba iadei bad kine ki 19 ngut ki nongbylla u ba pyntrei ia ka lynti surok ba la shim da ka Border Road Organisation (BRO).
“Ia mynta ki dang iai ap ia ka khubor na kane ka jingleit ka jong ki sha katei ka jaka. Kane ka thain ka dei ka ba pajih bad ka ba dap da ki khlaw ki btap.Ha ba khmih bniah halor ka jinglong jingman jong ka jaka, ngi la pan ruh ia ka jingiarap lem lyngba ka liengsuin helicopter jong ki shipai ka Indian Air Foce bad ka tnat NDRF (National Disaster Response Force) na ka bynta ban pynlong ka jingwad ia kine ki briew,” ong shuh shuh u DC.
U Nighee u la ong ruh ha ka ba iadei bad ka jinglapdien ia kawei ka met iap jong uwei na kine ki nongtrei kin dang hap ban pynthikna lyngba kitei ki heh sorkar bad heh pulit ki ba la leit jngoh sha katei ka jaka.
Shwa kane ha ka sngi ba Ar ba la lah, ki heh sorkar ka thain ki la shim ia ka jingkren jong ki nongshong shnong la ong ba ia ka met iap jong uwei napdeng kitei ki 19 ngut ki nongtrei bylla ki ba jah rngai la lapdien hajan ka wah Kumey.Kane ka jingjia ka la jia naduh kane ka taiew bala dep hynrei ka dang paw pyrthei tad haduh kane ka sngi ba Ar ba la lah.
Na ka liang ki trai shnong bad ki pulit ki pynpaw ruh ka jingsyier ba kine ki nongtrei baroh ki lah ban ngam jyllop ha ka wah Kumey.
Ka BRO ka la pyntrei ia ki ba bun ki projek ki ba heh hajan khappud ka China hapoh Arunachal.Na ka liang ki trai shnong ki la pyntip sha ki pulit da ka ba ong ba kine ki nongtrei bylla ki la mih na ka jaka ka ba ki pyntrei hadien ba u kontraktor u la kyntait ban ai shuti na ka bynta katto katne sngi hadien ba kane ka jingjia ka la wan jia.
Kine ki nongtrei bylla la ong ba ki la pyndonkam da ki lynti ka ba jan (shortcut) na ki jaka khlaw ba rben na ka bynta ban leitphai sha la ki jong ki iing ki sem ha Kokrajhar bad Dhubri jong ka Assam hadien ba ki la jah rngai noh.
