Shillong, Naiwieng 4 : U President ka BJP-Meghalaya Mondal Rikman G Momin ula ong ba ka party ka pdiang ia ka rai u Myntri Rangbah Conrad K Sangma halor ka jingpynkylla ia ka Kynhun Myntri, hynrei ka party kan dang ban iakren halor ka jingpan shuh shuh ia ka shuki Myntri.
Kane ka jingpynkylla ia ka kynhun Myntri kala mih da ka jingiehnohkam u President ka UDP Bah Metbah Lyngdoh, kaba lam sha ka jingpynrung ia u Bah Paul Lyngdoh, MLA ka West Shillong, uba la wanphai pat sha ka kynhun Myntri hadien ka jingiasoh bad ka NPP ha ryngkat bad arngut kiwei pat ki MLA ka UDP.
Haba kylli la ka BJP kan dawa kham bun ki shuki Myntri ha ka Sorkar MDA-2.0, u Rikman haba iakren bad ki nongthoh khubor ha ka sngi Balang ula ong “Ka biang beit, ngi la pdiang ia kaei kaba leh da u Myntri Rangbah. Tad haduh mynta ngi khlem pat iakynduh bad la ki jong ki MLA. Hadien ba iakynduh ia ki, Ngan sa lah ban batai sha phi”.
Haba kylli la ka party kam dom halor ka jingbym ioh shuh shuh ia ka shuki Myntri, ula ong “Kane ka kam kan dang iaid. Ngin sa kylli na u Myntri Rangbah. Ngin sa iakren bad u”.
Ula pynpaw ba ka kam ban dawa kham bun ki shuki Myntri ka dei ka kam ka ban sa iakren hapoh Iing. “Ia kane hi ngin sa iakren bad u (CM)” ula ong.
Haba kyntait ia ki khubor ba ki MLA ba dang shu rung thymmai kila pynpaw ia ka jingbym sngewtynnad bad dawa ia ka jingtuklar jong u bad ki nongialam na Delhi, u Rikman ula ong ba kam pat don satia ka jingialang haduh mynta.
“Ngim pat iakynduh ia ki MLA, ngin sa iashong jingialang shen. Hadien kata ngin sa kren sha phi” ula ong.
