Shillong, Naiwieng 04 : Ka Khasi Students’ Union (KSU), Mawprem Circle, ka dawa ïa ki bor district ban pynmih ïa ki jingbthah kiba shai haba pyntreikam ïa ki kyndon bad ki aiñ kiba ïadei bad ka jingdie bad jingthang bom pataka ha ka por Diwali, khnang ban pynthikna ba ka jingrakhe ïa kane ka tamasa kan long ha ka rukom kaba jai jai, kaba shongsuk bad kaba biang ïa baroh ki nongshong shnong.
Ka KSU ka pynshai ba kam don satia kano kano ka jingpyrshah ïa ka jingrakhe Diwali, kaba long kawei na ki tamasa kiba don jingmut ha ka kolshor bad ka jingngeit jong kiba bun.
“Hynrei, ka Seng ka ngeit ba ka jingrakhe ïa kano kano ka tamasa ka dei ban long ryngkat bad ka jingkitkhlieh bad ka jingburom ïa kiwei pat, khamtam eh ïa ki khynnah, ki tymmen, ki nongpang bad kiwei pat kiba lah ban shah ktah na ka jingsawa kaba jur jong ki bom pataka” ong ka KSU.
Ha ka dorkhas, ka KSU Mawprem Circle ka la kdew ïa ki jingbthah bad ki hukum jong ka Supreme Court of India halor ka jingpyndonkam ïa ki bom pataka, kaba la buh ïa ka por ba lah ban pynbthei bom naduh ka por 8 baje mynmiet haduh 10 baje mynmiet, katkum ki kyndon kiba treikam.
Ka Seng ka kyntu ïa ki bor ba dei khmih ba kin pynthikna ba tang ki bom kiba ïahap bad ki kyndon aiñ bad kiba biang katkum ki jingthew ba la buh, ki dei ban shah die bad shah pyndonkam. Ki bom kiba palat ïa ka pud jong ka jingsawa ba la buh, kata 125 dB(AI) ne 145 dB(C) Peak, haba thew na ka jingjngai kaba saw metre na ka jaka pynbthei, ki dei ban shah khang katkum ki kyndon ba la buh.
Ka KSU Mawprem Circle ka kyntu ruh ïa ka bor district ban pynlong ïa ka jingpeitngor kaba bniah halor ka jingdie, jingpynpoi bad jingpyndonkam ïa ki bom pataka, khnang ban khanglad ïa ka jingdie bad jingpyndonkam ïa ki bom kiba khlem ïahap bad ki kyndon aiñ.
Ka Seng ka dawa ruh ba ki bor pulit bad ki tnat sorkar kiba dei khmih ba ki dei ban pynkhlaiñ ïa ka jingpahara bad jingpeitngor ha ka thaiñ Mawprem, bad ban shimkhia da kaba pyntreikam ïa ki kyndon aiñ pyrshah ïa kino kino kiba pynkheiñ ïa ki hukum ba la buh.
“Ka jingrakhe ka dei ban wanrah ïa ka jingkmen bad jingsuk, ym ban long ka daw jong ka jingkhuslai bad jingpynwit ïa ka imlang sahlang” kala ong.
