Shillong, Naiwieng 04 : Haba pynksan ia ka rai jong ka Sorkar ban kyrshan ia ka Pre-Christmas Concert ka KJP Assembly bala buh ban long ha ka 12 tarik Nohprah, u Myntri Rangbah Conrad K Sangma ha ka sngi Balang ula ong ba ka Sorkar kam shym la kyntiew ia kano kano ka niam hynrei ka kyrshan ia ki briew bad ban pyni ia ka jingiadon bynta lang ha ka jinglehkmen jong ki ha ka rukom kaba burom ïa ka jinglong laitluid jong ki niam (secularism).
Haba jubab ia ki jingkynthoh pyrshah, u Conrad ula ong “Ngi khlem kyntiew satia ia kano kano ka niam hynrei ia ka jing ngeit jong ki briew kiba don ha ka haba ki lehkmen ia kaei kaba ki ngeit. Ngi shu iadon bynta lang bad ka jinglehkmen. Ngi u kyrshan ia baroh ki kynhun bad ka imlang sahlang, ngim ju jied. Kat kiba wan sha ngi, ngi kyrshan ia ki”.
Haba ai nuksa, ula ong “Ha kato kawei ka sngi, ka Balang Presbyterian kala wan bad ka jingthmu sha ngi bad ngi la ong hooid sngewbha pyniaid shakhmat ia ka kam bad ngin don ryngkat bad phi. Ha kajuh ka por ka Balang Baptist kala wan bad kila pynpaw ba ki kwah ban leh ia kane…ia katai bad Nga ong sngewbha iaid shakhmat bad ngin kyrshan ia phi. Ki paid Bihari ila wan ha kato ka sngi bad ong ba ki kwah ban leh ia ka Chhath Puja, 100 snem, ngi kwah ban kyrshan, Nga ong sngewbha pyniaid shakhmat bad Nga kyrshan ia phi”.
“To ngin sngewthuh ba kum ka Sorkar ngim shym don hangne ban kyntiew lane kyrshan ia kano kano ka niam, ngi don hangne ban kyrshan ia ki briew jong ngi. Ngi don hangne ban kyrshan bad iadonbynta lang ha ka jinglehkmen jong ki bad ka dei eh ia ka Sorkar ban leh ia kane ha ka rukom ka bym shah liang” ula bynrap.
U Myntri Rangbah ula ong ba kane ka juh ka lynti ka dei kaba leh ia baroh ki jait Niam. “Ngi la leh ia kane ha man ki programme-haba long ka Durga Puja, baroh ki MLA ki kyrshan, ngi kyrshan kum ka Sorkar ha ki rukom bapher bapher. Dei kumne ngi rakhe ïa ka kolshor bad ka rukom im kaba burom ïa ka nongrim jong ka jinglong laitluid jong ki niam ha ka ri jong ngi, da kaba pynthikna ba baroh ki jait niam kin ïoh ïa ka kabu kaba ryngkat bad ka burom kaba ïaryngkat,” u la ong.
U ong ba dei da kane ka jingngeit ba ka Sorkar kala rai ban kyrshan ia ki Musical Concert jong ki Balang.
U Conrad u iathuh b aula bthah ba ki prokram hapoh ka Meghalaya Age dei ban pynlong manla ka sngi hapoh ka Meghalayan Age Pavilion na ka bynta ki nongjngohkai, ba kynthup ia ki jingrwai Gospel ha ka sngi U Blei.
Ula kren ia kane haba plie ia ka District School Education Office cum Multilevel Car Park ha Mawkhar & Multilevel Car Park ha Motphran ha ka jingiadon ryngkat u Symbud Myntri Rangbah ba khmih ia ka tnad Transport Bah Sniawbhalang Dhar
