Shillong, Naitung 04: Ki Nonghikai Adhoc jong ki skul shimet bapher bapher kiba don hapoh ka lama jong ka FASTOM, kila pynpaw ia ka jingbym hun halor ka rai ban pynkiew ia ka Grant-in Aid bala pynbna da ka Sorkar Jylla hynne ka janmiet hadien ka jingialang jong ka kynhun Myntri.
Ka Sorkar Jylla kala rai ban pynkiew ia ka Grant-in-Aid sha baroh ki skul Adhoc ka Jylla, ka ban pynkiew ia ka tulop jong ki Nonghikai Adhoc da T.9000 bad T. 6000 shibnai.
Ki Nonghikai Higher Secondary School, Secondary School bad Nonghikai Science kin kiew tulop haduh T.9000 katba ki Nonghikai Upper Primary, Lower Primary, ki Nonghikai Hindi bad ki 4th Teacher ka SSA kin kiew da T. 6000 shibnai.
Kane ka rai kala pynlong mynta ia ka Sorkar Jylla ban hap buria haduh T. 100 klur manla u snem. Kane ka rai ban pynkiew tulop kan sdang treikam naduh ka 1 tarik u Naitung 2022.
U Nongaiktien ka FASTOM Bah Mayborn Lyngdoh ula ong ba ki Nonghikai Adhoc kim pat sngew hun satia ia ka rai jong ka Sorkar ban pynkiew ia ka Grant-in-Aid. U ong ba ki Nonghikai ki khlem dawa ia ka 50% ka jingpynkiew.
Une u Nongialam ka FASTOM ula pyntip ba ki Nonghikai kila rai ban iai bteng beit bad ka jingiakhih tad haduh ban da shim ia ka rai ba khatduh lashai ka sngi.
“Ngim pat lah ban shim rai la ngin pdiang ne em ia ka rai jong ka sorkar ban pynkiew ia ka tulop jong ngi, hynrei ngin sa leit iakren biang bad ki Ophisar lem bad u Myntri ba dei khmih. Ngi kwah ban pynkiew katjuh ia baroh ki Nonghikai naduh ki Higher Secondary haduh ki LP” ula ong.
“Ka jingtyrwa jong ngi hi ka long ia baroh ki kyrdan Nonghikai (Higher Secondary haduh LP) namar baroh kine ki Nonghikai kila iadonlang bad ngi ban mih sha surok mynta la lai bnai” bynrap u Bah Mayborn.
U Bah Mayborn ula ong “ Ka jingdawa jong ngi ka long kajuh ka jingpynkiew ia baroh ki Nonghikai. Ngi tip ba ka don ka jingiapher ha ki kyrdan hynrei ngi kwah ba ngin ioh lang ia kajuh ka jingpynkiew tulop”.
“Ngin sa shong bishar bha ia kaei ka rai ba ngi dei ban shim bad ngin sngap ia ka jingpynsngew na baroh ki Nonghikai hashuwa ban shim ia ka rai ba khatduh ha ka jingialang ban long lashai ka sngi por 11 baje mynstep” ula ong.
Da kane ka rai jong ka Sorkar hynne ka janmiet, ki Nonghikai Higher Secondary School kin ioh mynta ia ka tulop ba T. 33,000/-, ki Nonghikai Secondary kin ioh T. 29,000/- bad ki Nonghikai Science kin ioh T. 31,000/-.
Katba ki Nonghikai Upper Primary kin ioh T. 22,000/-, ki Nonghikai Lower Primary kin ioh T. 18,000/-, ki Nonghikai Hindi kin ioh T. 18,000/- bad ki Nonghikai 4th Teacher ka SSA kin ioh T. 18,000/-.
Through this, Teachers of Hr. Sec. Schools will get ₹33,000/-, Sec. Schools will get ₹29,000 & Science Teachers will get ₹31,000
UP Teachers will get ₹22,000, LP Teachers will get ₹18,000, Hind Teachers will get ₹18,000 & the 4th Teachers for SSA will get ₹18,000.
— Conrad Sangma (@SangmaConrad) July 4, 2022
