Dibrugarh, Sept 27: Wat hapdeng ka jingpahara ka jur bha ha kylleng ki distrik jong ka jylla Arunachal Pradesh ban wad ïa uwei u briew ba la shah rahbor ha ki suba kaikhlaw NSCN ha ka 23 tarik u Nailur, ki kaikhlaw ki la rahbor biang na ka distrik Tirap ba marjan, ha kaba ki la rah noh ïa arngut ki briew na ka jaka shna ïing.
Ki pulit ki la iathuh ba ka jingshah rahbor kaba ka la jia ha kawei ka jaka shna ïing ha ka shnong Barap kaba hap hapoh ka Lazu police station ha ka por kumba 11 baje eiei mynstep jong ka sngi Palei.
Katkum ki heh ophisar, ka kynhun jong ki kai khlaw NSCN kiba la kieng atiar bha ki la rahbor ïa arngut ki briew—u supervisor ïa ka jaka bad uwei u nongshoh maw—katba ki dang thiah ha ka ktem jong ki.
Hadien kata ki bor pahara ki la pynlong ia ka jingkhynra ha katei ka jaka hynrei kim shym la lah ban lap ia ki briew kiba la shah rahbor.
Katei ka jingjia kaba thymmai, ka dei hadien katto katne sngi, ba uwei u briew, uba 31 snem ka rta, ula shah rahbor ha ki suba kai khlaw NSCN, na ka shnong Khasa kaba hap hapoh Khakham Circle jong ka Longding district, ha ka 23tarik Nailur.
Une u briew uba la shah rahbor la tip kyrteng kum u Abdul Kadir uba dei na Assam kaba hap hapoh ka Hojai district.U Kadir u dang trei kum u nong shoh maw hapoh uwei u kontraktor ha kawei ka jaka ba shna ia ka Community Hall ha ka shnong Khasa ha kaba la kynnoh ba ki kai khlaw ki la rah noh ia u.
Ki bor pahara ki suba ba ka jingdawa pisa ka lah ban dei ka daw kaba lah ban jia ha lyndet jong kine ki arngut ki jingshah rahbor.
