Shillong Nailur 28: U President ka NPP Meghalaya bad Symbud Myntri Rangbah ka Jylla Bah Prestone Tynsong ula ong, ba ula sngewthuh shai mynta ba ka jingrem elekshon ki kyrtong ka NPP ha u snem 2024 bad 2025 kadei tang namar ka jingjur palat ka jingpynsaphriang ia ki khubor thok ban ialam bakla ki paitbah ha ki Social Media.
U Bah Prestone Tynsong ula kren ia katei ha ka jingialang paitbah ba la pynlong da ka NPP Pynursla Block ha Wahlyngkhat ha ka sngi Saitjain, ban pynshai bad ban kyrpad ia ki paitbah ban ai ka jingkyrshan kaba pura ia u Dr DRL Nonglait ha ka elekshon shiteng samoi ka Shillong Lok Sabha kaban sa long.
Ula ong, ba ha kine ki 2 sngi kiba la dep, ula leit sha Delhi ha kaba iadei bad ki kam sorkar hynrei la pynsaphriang ia ki khubor thok ha ki Social Media, hana ba u Bah Prestone ula kwah ban long Myntri Rangbah ka Jylla bad la pynsaphriang thok ruh ia ki khubor.
“Nga la leit Delhi ha ka 23 tarik bad u Symbud Myntri Rangbah u Bah Sniawbhlang bad u Myntri Rangbah ula wan ha ka 24 tarik Nailur. Ngi ia don jingialang bad ki heh ha Delhi. Hynrei la pynsaphriang ia ki khubor kiba laiphew jait laiphew rukom haduh ba la duh thiah duh dem lut baroh ha kylleng sawdong jong ka jylla bad ka phone kaba la iohpdiang ka long, balei ki jia kumne bad kane kadei ka jingkylli jong u paitbah” ong u Bah Prestone hakhmat jong ki hajar ngut ki paitbah kiba la wan sha ka jingialang.
“Nga shu kwah ban pynkynmaw ia phi ba ha ka elekshon ha u 2024 bad 25, pleng nga sngewthuh hangne, ba pleng kito ki artylli ki elekshon kiba ngi shah rem kidei kiba iaid da ka Social Media bad haduh katto ka treikam ka Social Media ban pynsngewthuh bakla ia ki paidbah tang da kaba ki thoh laiphew jait laiphew rukom da kaba shu thok, shu jler bad nga kwah ba kiba kum kita ki briew kin ai jubab hakhmat jong ngi u paitbah” la ong u Bah Prestone uba long ruh u MLA ka Pynursla Constituency.
U Bah Prestone ula ther tyngeh ruh ia ka Voice of the People Party (VPP) kaba ialam ia ka KHADC halor ka jingpynduh pyndam noh ia ka kyndon jong ka Land Act bad wat u Lat ka Jylla ula pynphai noh ia katei ka Amendment Bill.
“Ka don kawei ka Amendment Bill jong ka Land Act, ym banse u Lat ka Jylla ula ong ba yn hap ban pynphai noh namar kata ka aiñ ka long bym ithuh shuh, ia u Rangbah, ki bor shnong, bor Raid, bor Hima, hana um donkam shuh, baroh hap leh hangtei ha District Council. Nga lah pule bha bad nga tip bha bad ym dei ba nga shu kren tang ha ka social media. Nga lah pule iwei pa iwei i lain, ia kata kaba ki leh ia ka Amendment ban pynkylla kaba ktah ia ka riti ka dustur bad khamtam eh ia ki bor shnong ki bor thaw” ong u Bah Prestone bad ka kyntu ia ki paitbah ka bri u Hynniewtrep ba kidei ban bishar bha.
Ha kaba iadei bad ka jingialap elekshon ia u kyrtong ka NPP, u Bah Prestone ula ong, ba u Dr DRL Nonglait udei u riewrangbah uba shemphang, sngewrit, tipbriew tipblei bad uba don burom bad akor, kumta kan long kaba eh bha ban ioh ia kum une u riewrangbah bad ula kyrpad ia ki paitbah ba kin ai ka jingkyrshan kaba pura bad ban pynjop donburom ia u Dr DRL Nonglait ha ka elekshon shiteng samoi jong ka MP kaban sa long.
