Guwahati, Naitung 04: U hehduh jong ka All India United Democratic Front (AIUDF) u Badruddin Ajmal u la kyntu ia ki paid Muslim ha Assam ba kin kiar na ka ba pyniap masi ha ka por ka jinglehniam Eid.
Ha ba kren sha ki lad pathai khubor, u Ajmal u ba dei ruh u nongmihkhmat ula ong ba ka Eid ka dei ka tamasa lehniam jong ka jingkmen. “Ha ka ba kum kane ka por, ngim dei ban leh ei ei ruh ki ba long pyrshah ia ka jingngeit niam jong ki para ki hymmen ki ba dei na kiwei pat ki jingngeit niam hapoh ka ri,” ong u Ajmal.
Nalor kata u la ong ruh ba kim don satia ki kyndon ain ki ba ki ban pynksan halor ka jingpyniapher na ka bynta ka jingknia ka ba da ki masi ha ka por jong ka jingleh niam Eid. U la ong ki don shibun kiwei pat ki jait mrad nalor ki masi. “Ngi lah ban knia ia ki bad ban kiar na ka ba knia da ki masi,” ong une u heh ka AIUDF da ka ba khot ruh ia baroh ki paid Muslim ba kin leh kumjuh.
Shuh shuh u Ajmal u la ong ruh, “Ban ktah ia ka jingsngew jong kiwei pat ka dei ka pop ka ba khraw. Halor kane ka nongrim nga khot ia ki paid Muslim ba kin kiar na ka ba knia da ki masi ha baroh ki por”. Nalor kata u la ban ruh da ka ba ong, “Ka niam ka jong ngi kam shym la hikai ia ngi ban pynsngewsih ia kiwei pat ki briew ne ki mrad. Lada ki don ki ba leh ia kata, kin ym ioh jaka ha bneng.
U la ong shuh shuh ba ki don katto katne ki briew na kiwei pat ki jait niam bapher bapher, ha ka ba katto katne na ki, ki mane ia ka masi, kumta balei ka donkam ban knia ia ki?
