Guwahati, Naitung 19 : Ka kynhun myntri ka Assam ka la mynjur ia ka mangtyngka ka ba T. 839.95 klur na ka bynta ban thaw ia santylli ki kynhun ki pulit Commando Battalion ha ka jylla.
Ia kine ki battalion yn phah sha kito ki jaka ki ba ju mih khah khah ki jingiakynad bad ka ban kyntiew ruh halor ka jinglah jong ka tnat pulit ban iakhun pyrshah ia ki kam pyntriem bad halor ki kam iakhun pyrshah lehnoh.
Na ka liang u myntri ka tnat tourism, u Jayanta Malla Baruah u la pynpaw ia kane ha ba kren sha ki lad pathai khubor hadien jong ka jingialang.
Ia kine ki san kynhun battalion yn pyntreikam hapoh Hailakandi, Karbi Anglong, Sivasagar, Biswanath bad Tinsukia district.
U Myntri Rangbah (CM) ka Assam u Himanta Biswa Sarma hynnin ka sngi Nyngkong u la pynpaw lyngba ka twitter da ka ba ong; “Kane ka dei napdeng ki ba bun kiwei pat ki jingshim rai ha ka jingialang jong ka kynhun myntri, kata ka ba iadei bad ka jingthaw ia ka kynhun battalion bathymmai, ka jingshna ia ki lynti ropeway bathymmai, ka jingshna ia ka Assam Complex ha Maharahtra, ka jingkyntiew ia ka jingtip ha ka ba iadei bad ka forensic, ki lad jingiarap sha ki longiing ki ba duna ha ka ioh ka kot nalor kiwei pat.
Ha u bnai Jylliew jong ka snem ba la dep, ka sorkar Assam ka la shim ia ka rai ban thaw ia 10 tylli ki kynhun commando battalion ki ban iasyriem bad ka tnat National Security Guard (NSG) khnang ban pynkhlain ha ka jingialeh jong ki pulit ban tehlakam ia ki kam pyntriem ha ka jylla.
