Guwahati, Naitung 19 :Ki bor pulit ka Hojai district ka Assam ki la ioh ban kurup ia u drok brown sugar u ba shongdor haduh kumba T. 1 klur. Une u drok ba la ioh kurup u don ia ka jingkhia ka ba 983 gram.
Ia une u drok la ioh kurup na ka jingkhynra hapoh kawei ka iing ha South Hill Colony ka ba hapoh Hojai district ka Assam. Halor kane ki pulit ka Assam ki la kem noh ruh ia uwei u briew u ba donkti ia u ba la tip kyrteng kum u Deabash Hore.
Na ka liang ki pulit ki la ong ba u Hore u la wanrah ia une u drok napoh Dimapur shapoh Nagaland bad sha Hojai, Assam lyngba ka rel. Une u briew u don ia ka jingthmu ban pyniaid iew ia une u drok hapoh Hojaidistrict, ong ki pulit.
Lah ban kdew ba ki bor pulit ka Assam naduh kane ka snem ba la dep ki la trei borbah ha ka ba iadei bad ki sienjam ban iakhun pyrshah ia ka jingjyllei jong u drok.
Naduh katei ka por, ki pulit ka jylla ki la ioh ban kurup ia shibun bah ki drok ki ba la kot da ki klur tyngka.
