Mynjur ka GHADC ia la ka jong ka Electoral Roll | Tang ki ST ba lah ban iakhun ne thep vote ha ki elekshon

Tura, Aug 10: Ka Garo Hills Autonomous District Council (GHADC) ha ka sngi Nyngkong, kala mynjur ia ka Amendment ne jingpynkylla ia ka Rules 128 bad 129, kaba plie lad ban don noh ia la ka jong ka Electoral Roll ne thup kyrteng elekshon jongka elekshon GHADC bad ban khanglad ia ki bar jylla ba kin iakhun ne iashimbynta ha ki elekshon ka Council.

Kane ka sienjam kadei ka jingpynkylla ha ka rukom long rukom man ha kaba iadei bad ka Electoral Roll jong ka Sixth Schedule bad kaba la pynurlong ruh ia ka jingdawa kaba la sahteng jong ka rilum Garo bad ka jingkular kaba la khlei da u Myntri Rangbah ka Jylla bad u Nongialam ka seng National People’s Party (NPP) u Conrad K. Sangma.

Lah bun phew snem, ia ka elekshon GHADC la pynlong da kaba pyndonkam ia ka Electoral Roll kaba la pynkhreh na ka bynta ka elekshon Assembly. Da kane ka jingpynkylla thymmai, katei ka rukom treikam kan kylla noh da ka thup kyrteng kaba kyrpang kaba la pynkhreh thik na ka bynta ka elekshon jong ka District Council.

Kane ka jingwanrah ia ka jingkylla ka long kaba kongsan ym tang ba ka wanrah ia ka thup kyrteng kaba kyrpang ia ki nongthep vote hynrei namar ba kala pynkylla syndon ia ka jinglong jong ki nongthep vote jong ka GHADC.

Hapoh jong kane kajuh hi ka kyndon, kiba lah ban thep vote kin dei kiba la pyniasoh bad ka jingioh ia ka kyrdan Scheduled Tribe kumba la ithuh da ka jylla Meghalaya ryngkat bad kiwei pat ki jingbuh kyndon. Kane kan ym kynthup shuh ia kito ki bym dei ki riewlum ha ka Electoral Roll jong ka GHADC.

Kane ka jinglong jingmam kadei kaba la mih hadien ba la mynjur ia ka jingpynkylla ne Amendment kaba la mynjur ha u bnai Lber mynta u snem kaba la wanrah ia ka kyrdan Scheduled Tribe kum kiba lah ban iakhun ia ka elekshon jong ka District Council.

Kane ka jingkylla ka mihkhmat ia ka jingpynkylla ia ka rukom pynlong ia ka elekshon kaba la don lypa naduh ka por ba la thaw ia ka GHADC ha u snem 1952, ha kaba ki dkhot ne kino kino ki jaitbynriew kila lah ban iashimbynta ha ka elekshon jong ka Council.

Ka jingdawa ia ka thup kyrteng kaba la ka jong kadei kaba la rah bad pynpaw da ki snem ha Garo Hills, ha kaba ki nongkyrshan kila pynpaw ba ka jingshna ia ka thup kyrteng jong ka elekshon jong ka riti treikam hapoh ka Sixth Schedule kadei ban iaid katkum ka jingpynkup bor ka riti synshar ka ri ban iada ia ka bha ka miat jong ki riewlum bad ban plie lad ia ki riewlum ban synshar hi dalade.

Ia kane ka Amendment la mynjur ha ka iingdorbar hynrei kaba kham sngewphylla ka long ba u MDC ka Tura u Rimpu Marak, ym shim la don satia ha ka iing dorbar ha ka por ba mynjur ia kane ka Amendment.

Kane ka Amendment mynta kala plie ia ka lynti ban pynkhreh ia ka thup kyrteng kaba kyrpang jong ki nongthep vote ka GHADC, kaba long ruh kum kawei na ki jingpynkylla kiba khraw ha ka rukom pynlong elekshon ha ka Council naduh ba la thaw ia ka.

Ka long ka jingkdew ia ka rukom pynkylla kaban batai shai kdar mano kiban ioh jied ia ki nongmihkhmat sha ka jaka treikam jong ka Sixth Schedule ban iada ia ka bha ka miat jong ki riewlum bad ia ka rukom synshar khaddar.