Dibrugarh, Naiwieng 5: Khyndai ngut ki samla ki la jah rngai na ki bynta bapher bapher jong ka District Tinsukia jong ka Assam, kaba la pynmih ïa ka jingsngewkhia halor ka jingïadei jong ki bad ka seng lehnoh ba la khang pyrshah ka United Liberation Front of Asom-Independent (ULFA-I).
La iathuh ba saw ngut ki samla na ka thain Kadamguri — u Lakshmajit Moran, u Biplab Moran, u Hati Moran bad u Nipu Bor — ki la mih na iing ha ka por ba pynlong ia ka jinglehniam Durga Puja bad kim shym la wan phai shuh naduh katei ka por.
Ha kawei pat ka jingjia, ki don ruh ki san ngut ki samla na ka shnong Tekebari kiba hap hapoh jong ka Pengeri Police Station kiba la jah rngai. Kitei ki dei kiba la tip kyrteng kum u Gouranga Baruah, u Ujjalit Moran, u Bichitra Baruah, u Chote Bhatta bad u Gunit Baruah.
Na kitei ki 5 ngut, u Gouranga Baruah bad U Ujjalit Moran, ki la jah rngai ha ka 18tarik Risaw, katba u Bichitra Baruah, u Chote Bhatta bad U Gunit Baruah, ki dang sah khlem lap shuh naduh ka 27tarik Nailur.
Katkum ki tyllong khubor ba la iohlum, la iathuh ba kitei ki 5 ngut ki samla ki la mih na la ki jong ki iing ki sem da kaba shu ong ba ki kwah ban iakren ia ka jingialehkai phutbol bad ki paralok. Ki bahaïing jong ki kim shym la ïakynduh bad ki naduh kata ka por.
Ka don ka jingtieng ba ki samla kiba la jah ki lah ban rung sha ka ULFA-I, watla ka jaka sah jong ki bad kano kano ka jingiadei kaba lah ban don bad katei ka kynhun kam pat lah ban pynthikna.
Ki pulit bad ki bor pahara kim shym la pynmih kano kano ka jingpynbna kaba pynthikna ia kitei ki jingsuba ba ki don jingiadei. La ujor ia ki briew kiba jah rngai, bad ki pulit ki dang tohkit ia kitei ki kam.
Ki jingjia kiba dang shen ki la wanrah biang sa shisien ia ka jingeh kaba lah ban mih na ka jingpynrung ia ki samla da ki kynhun kaikhlaw ha Upper Assam. Ka Tinsukia ka la sakhi ia ki jingjia kiba kum kine jong ki samla kiba jah rngai hapoh ki jingjia kiba suba ha ki por ba la leit noh.
