Shillong, Naiwieng 05 : U Myntri Rangbah Conrad K Sangma ha ka sngi Palei, ula buh mawnongrim ban shna ia ka Integrated hospital ba 100 jingthiah ha Ummulong, West Jaintia Hills District, kaba la mang haduh T.53 klur.
Ia kane ka hospital la khmih lynti ba kan pynkhlain ia ka jingdon ki jaka sumar ha ka district bad pynkhlain ia ka jingai jingshakri ia ki paid nongpang ka thain.
Haba kdew ia ka jingpynleit jingmut ka Sorkar ban pynpoi ia ki jaka sumar sha ki jaka nongkyndong, u Conrad ula ong ba ka hospital kan wanrah ia ka jingai jingsumar khamjam sha ki shnong ki thaw.
“Ka Integrated Hospital ka dei shibynta jong ka jingpyrshang jong ngi ban pynkhlain ia ka jingshakri ha ka koit ka khiah khamtam ha ki jaka nongkyndong, bad pynthikna ba ki jingai jingsumar kiba donkam ki poi shajan jong ki shnong ki thaw” ong u Conrad.
“Ha kine ki 8 snem tam bala leit, ngi la trei ia ki kam ban pyndap ia ki jingduna ha ki jingtei ia ki jaka sumar bad ki nongtrei, haba pyniar ruh ia ka jinghikai sha ki samla pule doktor khnang ban lah pynbun ia ka jingdon ki doktor ki ban shakri ha Jylla” ula bynrap.
U Myntri Rangbah ula air uh ka jingiaroh ia u Myntri ka Koit ka Khiah Bah Wailadmiki Shylla bad ka Tnad ka Koit ka Khiah halor ka jingpynwandur bad thaw ïa kane ka projek.
Haba ban jur ïa ka jingdonkam jong ka jingsumar ïa ki nongpang ryngkat bad ka jingpynroi ïa ki jingtei, u Conrad u la ong, “Katba ngi pynlut ïa ka pisa ban tei ïa ki jingtei, to ngin kynmaw ba ka jingshakri ha ka koit ka khiah kaba bha kam shong tang ha ki dawai dashin, hynrei ka kynthup ruh ïa ka jingisynei, ka jingjemnud bad ka jingsumar sbun ïa uwei pa uwei u nongpang.”
Kane ka projek ka dei shi bynta jong ki jingpyrshang kiba kham heh jong ka Sorkar Jylla ban pynkhlaiñ ïa ki jaka ai jingshakri ha ka koit ka khiah, ban pyndap ïa ki jingduna ha ki jingtei jong ka tnad ka koit ka khiah bad ban pynsuk ïa ki paidbah ban ïoh ïa ki jingshakri ha ka koit ka khiah, khamtam eh ha ki thaiñ nongkyndong bad ki jaka kiba dang duna ki lad jingshakri.
