Shillong, Naiwieng 04: Ka National People’s Party (NPP) ka la nang suhthied shuh shuh ha ri-lum Garo da ka jingwan pyniasoh ki 3 ngut ki MDC ka Trinamool Congress bad uwei u ophisar ba la shongthait sha ka NPP.
Kiba la pynïasoh ki long u Executive Members Alphonsush R Marak u MDC ka Williamnagar, u Cherak Watre Momin MDC ka Kharkutta, u Chairman ka BRDA u Rakesh A Sangma, bad u MCS officer bala shong thait u Pius D Sangma.
U Myntri Rangbah ka Jylla uba dei ruh u national president ka NPP u Conrad K Sangma u la pdiang burom ïa ki ba wanrung thymmai shaka Party ha ka jingïadon lang u Symbud Myntri Rangbah ka Jylla uba dei ruh u State President u bah Prestone Tynsong bad u Symbud Myntri Rangbah ka Jylla bad u National Vice President u Bah Sniawbhalang Dhar.
Haba kylli shaphang ki tiket na ka bynta ki 3 ngut ki MDC, u Conrad u la ong, “Ka party kan sa rai, baroh ngin shong lang. Ia mynta ym pat don kano kano ka kyndon kaba la buh, ba hap ban ai tiket ne em ne yn pyniakhun da uwei bad shong kiwei pat. Ngin sa peit kumno ka jinglong jingman jong ka party kan long. Ngi ngeit ba ngin sa shim ïa ka rai kaba long kaba ïa mynjur lang baroh bad kane ka pyni iaka jingïatylli kaba phi ïohi haba ki nongïalam kiba wan rung bad ïasoh bad kane kan ai jingmyntoi iaka Party bad kumta ngi khmih lynti bad ngi ngeit ba kano kano ka rai kaba ngi shim katkum ka jinglong jingman ha ka saiñ hima sima kin ïaid shakhmat ha ka lynti kaba dei.”
Naka liang u Bah Prestone Tynsong u la ong ba ka jingshna ia ki thup kyrteng ki nongthep vote na ka bynta ki constituency ba dang shu tyrwa phiah thymmai ha Garo Hills ka dei ka jingjop kaba khraw tam jong ka NPP.
“Ka Electoral Roll jong ki constituency ba dang shu tyrwa phiah thymmai ha baroh kawei ka Garo Hills, kumta kane ka dei ka jingjop kaba khraw tam kaba nga dei ban ong ba ka party ka la leh na ka bynta ka jingmyntoi jong ka thain Garo Hills, ym don mano mano ba lah ban leh, ym don kawei pat ka seng sain pyrthei kaba lah ban leh ia kata,” u la ong.
U la bynrap, “Ka dei namar kata, kumta u paralok baieit jong nga khamtam ki nongmihkhmat jong ngi ha Garo Hills to ngin nang trei shuh shuh na ka bynta ka jingmyntoi jong ka imlang sahlang jong ngi, na ka bynta ka jingmyntoi jong ka jylla bad hangne ngi don ïa u nongïalam uba khraw tam na ka NPP bad uba long ruh u kapten jong ka sorkar jylla, u Conrad K Sangma bad nga thikna ba un lah ban pynkhlain shuh shuh ïa kane ka jingshlur ban shakri paidbah”.
U Bah Sniawbhalang Dhar u la ong ba u nombar 3 u la paw ba u long uba donbok ia ka NPP. “Ha ka taiew ba la dep ngi la pdiang sngewbha ia 3 ngut ki MLA na ki seng sain pyrthei bapher bapher bad mynta ka sngi ngi la ioh biang ia 3 ngut ki MDC, ka long kumba 3 nombar ka long kaba donbok ia ka NPP,” u la ong.
“Da kane ngin leh bha bha ha kane ka elekshon MDC ban wan ha GHADC. Ka jingwan jong phi sha ka NPP ka dei ka jingkyrkhu bad na baroh ar ki thain kiba dei ka Garo Hills bad Khasi-Jaintia Hills, ngi nang kiew ka jingkhlain na kawei ka sngi sha kawei pat bad ngi kyrmen ba ha kane ka ilekshon shiteng samoi ngin jop ia ka elekshon bad ha u snem 2028 ngin jop daka jingbun paid” ula ong.
