Nagaland | Iatai ka Sorkar halor ka jingwad umphniang, FNTA bad ka jingktah ka jingshlei um

Wokha, Nailur 10: Ka Kynhun Myntri jong ka Nagaland ka la ïakynduh ha Doyang, Wokha ban ïamir jingmut halor ki mat ba kongsan, kynthup ïa ka jingwad umphniang, ka surok Foothill kaba la sahteng, ka jingtyrwa ïa ka Frontier Nagaland Territorial Authority (FNTA), bad ka jingktah jong u slap ba khlem sangeh bad ka jingtwa khyndew ha kylleng ka jylla.

U myntri ka tnad pule puthi bad ka kam jngohkai pyrthei u Temjen Imna Along u la batai ïa kane ka jingïalang kum ka “histori”, da kaba ong ba u Myntri Rangbah ka Jylla Neiphiu Rio u la ïalam ïa ki jingïakren halor ki katto katne ki mat kiba don jingktah kaba khraw ïa ka Jylla Nagaland.

Halor ka jingwad umphniang, u Along u la ong ba ka sorkar ka dang iai bteng ban iada ia ka jingmyntoi jong ki trai jaka bad ban pynthikna ia ka rukom treikam kaba kynthup lang ia baroh.U la ong ba dei ban pynbeit ia ki jingeh jong ki paidbah ha ki jaka ba la ithuh ban wad bniah.

Haba jubab ïa ki jingangewkhia ba la pynpaw da ka Central Nagaland Tribes Council (CNTC), u myntri u la ong ba ka nongrim jong ka sorkar ka long kaba shai ba ka jingmyntoi jong ka Nagaland ka dei ban wan hakhmat eh, kynthup ha ki kam kiba ïadei bad ka jingïasngewthuh jingmut ki lai-liang kaba kynthup ïa ka Nagaland, ka Assam bad ka sorkar kmie.

Halor ka Surok Foothill u la paw bha ha ki jingiakren. U Along u la ong ba ka kynhun myntri ka la bishar bniah ia ki jingpynkylla ba thymmai bad ka Union Ministry of Road Transport and Highways, kynthup ia ki jingtyrwa ban pynbeit ia ki surok kiba heh 13 meter, 18 meter bad 12 meter.

U la batai ia ka Surok Foothill kum ka “lynti jong ka jingim” kaba lah ban long na ka bynta ka jingkiew biang ka ioh ka kot jong ka Nagaland, da kaba pynpaw ia ka jingdonkam jong ka na ka bynta ka jingpyniasoh bad ka jingroi jingpar.

Halor ka jingtyrwa jong ka FNTA, u Along u la pynthikna ba kane ka mat la khmih lynti ba kan mih ha ka dorbar jong ka iing dorbar thawain ka Assam ka ban wan.

Hynrei u la ong ba ia ka thup ba pura jong ki jingialang ym pat lah ban pynmih bad ba u Lamphang ka iing dorbar un don ha ka kyrdan kaba kham bha ban pynshai ia ka agenda.
Ki jingshlei um, ki jingtwa khyndew ki la shim ia ka bynta kaba kongsan.

Haba kylli halor ki jingkren ba dang shen na ka sorkar Assam ha kaba ïadei bad ka jingshlei um bad ka jingkynnoh tih dewïong ha Nagaland, u Along u la ong ba ka sorkar jylla ka tip ïa ki jingkren hynrei ka pynskhem ba ka jingthmu ba kongsan jong ka ka long ban ïarap ïa ki briew kiba shah ktah ha ki jingshah lynshop ha ka mariang kiba dang ïaid shakhmat.

Katto katne ki jaka, kynthup ia ka Mon bad Tuli, ki la shah ktah ha ka jingtwa khyndew kaba ju jia man ka por bad ka jinghap slap kaba jur, ha kaba la iathuh ba ki briew ki la duh ei ia ki mynsiem briew.

“Ka sain pyrthei ka dei kawei”, la ong u Along da kaba ban jur ba ka sorkar ka dei ban dang pynleit jingmut ha kaba iarap ia ki briew kiba shah ktah ban wanphai biang sha ka jingim kaba ju long man ka sngi.U la khot ruh ban pynskhem ia ki jingshisha shwa ban khein ia ki jingpynkut ne ki jingai jingmut kum ki jingshisha.

Ka jinglong ka suinbneng kaba sniew ka la pynthut ruh ia ki skul bad ki jaka pule ha ki bynta jong ka jylla.U Along u la ong ba ki heh sorkar ki dang trei ban pynphai biang ia ka jinglong kaba ju long man ka sngi bad ban pynduna ia ka jingktah ia ka academic calendar.

Katba ka Nagaland ka la pynkhreh na ka bynta ka jinglong jingman ka suinbneng, u la ong ba ka jingjur jong u slap dang shen ka long kaba khlem khmih lynti, kaba pynpaw ia ka jingdonkam ban pynkhlain ia ka jingpynkhreh na ka bynta ki jingjia ba sngewsih.

Ka sorkar, u la ong, kan sa pyrkhat shuh shuh ia ki lad ki lynti ban pynbha ia ka jingpynkhreh bad ban pynduna ia ka jingktah na ka jingtwa khyndew kaba ju jia man ka por, ka jingjur slap bad kiwei kiwei ki jingjia ba sngewsih jong ka mariang.