Aizawl, Jylliew 17:Haduh 800 tylli ki kyrteng jong ki nongthep vote ki ba dei na ka jaidbynriew Bru ki la shah pyndam noh na ka electoral roll ha Mizoram.
Ia ki kyrteng jong kine ki nongthep vote na ka jaidbynriew Bru la pyndam noh na ka electoral roll ha Mizoram bad mynta ki la shong la sah duh hapoh Tripura.Nalor kata kin dang don shuh shuh ki kyrteng jong ki nongthep vote Bru ki ban dang shah pyndam na ka electoral roll ka Mizoram.
U joint chief electoral officer (CEO) ka Mizoram, u David L Pachuau u la pyntip ba haduh kumba 1000 ngut ki nongthep vote ki ba dei ki jaidbynriew Bru ha Tripura ki la phah ia ki aplikeshon sha ka sorkar Tripura na ka bynta ban kynthup ia kine ki kyrteng jong ki hapoh ka electoral roll ka jylla.
Lah ban kdew ruh ba ia ki kyrteng jong kumba haduh 1090 ngut ki nongthep vote Bru la kynthup hapoh ka electoral roll jong ka jylla Tripura.
Da ki hajar ngut ki jaidbynriew Bru ki la phet krad noh na Mizoram sha Tripura hadien ba ka la mih ka jingiakynad iapher jaidbynriew ha ka jylla ka ba la khie ha ki snem 1990, bad naduh katei ka por ki la shong riehtngen ha Tripura.
Watla katta la shah ia kine ki jaidbynriew ba kin shongduh ha Tripura hadien ka jingiamynjur hapdeng ka sorkar pdeng, ka sorkar ka Mizoram bad Tripura nalor ki nongialam jong ki phetwir Bru ha ka 20 tarik u Kyllalyngkot 2020.
