Shillong, Jylliew 17: U Myntri Rangbah ka Jylla Conrad Kongkal Sangma hynne ka sngi thohdieng, ula bthah ia ki Ophisar ka Jylla ba kin pyllait kloi ia ki song jingiarap da ka pisa, sha baroh ki longiing kiba mad ia ka jingduh noh ki mynsiem briew na ka jingshlei um bad jingtwa khyndew ba jia ha Jylla.
U Myntri Rangbah ula bthah ia kane ha ka jingialang bishar (review) ia ka jinglong jingman ha Jylla ha kine ki 24 kynta ba la leit noh, bala leh lyngba ka video conferencing bad ki Chairmen jong ki Regional Committee, ki Deputy Commissioner bad ki Heh ka Tnad Pulit bad ki Tnad Sorkar.
Communicated with Chairmen of the Regional Committees, DCs, @MeghalayaPolice & Departments via VC to review the situation in the Districts in the last 24 hours & to chalk out our plan of action for the Districts. @PMOIndia @AmitShah pic.twitter.com/GgnI1E7Z4c
— Conrad Sangma (@SangmaConrad) June 17, 2022
Haba pynpaw ia ka jingsngewsih halor ka jingduh ki mynsiem briew ha Jylla ha kine ki khyndiat sngi bala leit, u Myntri Rangbah ka Jylla ula kular ban ai ki jingiarap ba donkam ha manla ki District ha kum kane ka khep ba mynta.
Ha kane ka jingialang, ki Deputy Commissioner kila pyntip ia ki sienjam ba kila shim kynthup naduh ki jingjulor kiba wan na ka jingshlei um bad jingtwa khyndew, ka jingdon jong ki briew ba iap bad ki sienjam ban leit ai jingiarap ha man la ki jaka ba shah lynshop.
U Myntri Rangbah ula kyntu ia ki kynhun bor Sorkar ba kin pynthikna ia ka jingleit sam ia ki marbam mardih, ban pynkynriah ia ki briew na ki iing iba i don jingma, ban ithuh khambun ia ki jaka rieh tngen, ban pynthikna ia ka jingpyllait kloi ia ki song jingiarap sha ki Longiing kiba duh noh iala ki baieid ba thoiñ bad ruh ban maramot biang ia ki surok ba pyniasoh sha ki District.
Haba pynpaw ba ka jingshngaiñ jong ki Paidbah ka dei kaba kham kongsan eh, u Myntri Rangbah ula kyntu ia ki Deputy Commissioner ba kin iatreilang bad ki Nongialam Shnong ha kaban ithuh ia ki jaka ba i don jingma na ka jingshlei um bad ruh ban pynkynriah ia ki briew na kine ki jaka sha ki jaka ba shngaiñ.
