Shillong, Iaiong 06 : U MLA ka UDP Bah Mayralborn Syiem ha ka sngi Nyngkong, ula ong ba man la ki seng sain pyrthei ki ju mad beit ia ka por ka jingkiew bad ka por ka jingkhyllem bad ka nusib ka ju kylla beit bad ki nongthep vote ka Meghalaya kin sa rai haba kut.
U Bah Mayral ula kynthoh ia kane halor ki khana ba paw bha ka Voice of the People Party (VPP) ha ka elekshon Shillong Lok Sabha 2024 bad kaei ka ban jia ia ka elekshon shiteng samoi.
“Ka don ka por ia kiei kiei baroh. Ka don beit ka jingkiew bad ka jinghiar jong kano kano ka seng sain pyrthei” kynthoh u Bah Mayral.
“Lada phi iakren ia ka sain pyrthei hapoh ka ri, ka don ka por kaba ka congress ka khlain bha bad mynta kala troin. Ka BJP ka khlainbha. Kan sa poi ka por ba ki paidbah kin sa ai ia ka jubab kaba iahap bad kano kano ka Sorkar. Kane ka dei kaba ju jia beit”.
Ula ban jur ba ym don satia kano kano ka seng sain pyrthei ka ban don beit ha ka bor shu junom.
“Kam don satia kano kano ka seng sain pyrthei ka ban neh haduh 40-50 snem. Kane ka dei ka jingitynnad jong ka synshar paidbah- ta ka daw ngi dei shibynta jong kane ka synshar paidbah ba don da ka riti synshar, ki elekshon bad ka jingkylla ha ka jingpaw”.
U Bah Mayral ula ong ba ym tang ka VPP hynrei man ki seng sain pyrthei kila mad ia ka jingkyrshan u paidbah ha ki por bapher bapher.
“Ka BJP kala pawnam bha, ka NPP kala pawnam, ka UDP ruh. Baroh ki seng sain pyrthei kila paw nam. Phim lah ban tip kaei pat ka ban jia. Ki nongthep vote ka Meghalaya ki dei kiba stad bad ki tip iano ban jied kum ki nongmihkhmat jong ki. Ngi ieh ha ka jingstad u paidbah” ula ong.
