Shillong, Iaiong 15: Ka lympung ialehkai 5th Meghalaya State League ka la sdang da ka jingiakhun jong ka Group A, ha kaba ka kynhun ialehkai ka Nongkseh SSCC ka la lah ba kan pynliem ia ka Khimusniang SC da 2-1, ha ka jingiakhun kaba la long ha ka janmiet sngi Balang ha SSA Stadium, First Ground, Polo.
Ki rang ialehkai kiba la ioh ban ia pynkhih ia ka jar ha kane ka janmiet ki long u Sheen Sohktung (19’) bad u Hardy Cliff Nongbri (90’+2) kiba la thep naka bynta ka Nongkseh SSCC katba u Dawanbiangmi Passah (51’), u la ioh ban thep naka bynta ka Khimusniang SC.
Kumban shu pynkynmaw ba kine ki ar kynhun ki la ioh ba kin ia iuh kjat nyngkong ha kane ka lympung bnah ialehkai phutbol ba heh tam ha ka jylla ia kaba la pyniaid ia ka da ka Meghalaya Football Association ia kaba la iarap ban kyrshan pat ia ka da ka tnat Directorate of Sports and Youth Affairs.
Ia kane ka lympung la wan ban plie ia ka da u Myntri ba dei khmih ia ka tnat Sports and Youth Affairs u bah Wailladmiki Shylla ia kaba la don lang ryngkat ki nongkit kam ka MFA hapoh ka jingialam u bah Hamletson Dohling, bah Sunesh Syiem kiba long President bad Secretary ka MFA bad ki dkhot nongkit kam ki jong ka, bad ba la wan ban sakhi bad ai mynsiem ia ki kynhun ba ialehkai da ki paidbah nongkyrshan jong baroh ar ki kynhun.
Haba phai sha ka jingiakhun, marsien ia sdang, ka Khimusniang, ki la lah ban tynjuh borbah bha ia ka kynhun ialehkai ka Nongkseh, katno tam lei lei na u Dawanbiangmi uba la lah shisha ban pynpaw ia la ka jingtbit bad pynkhih win bha ia ka kut ialehkai ka Nongkseh.
Pynban ynda haba ka jingiakhun ka la jam palat ia ka shiphew minit, ba ka Nongkseh SSCC ki la sdang ban kyntiew ia ka rukom ialehkai bad bad ha kum kane ka por, ba u Sheen uba la san bad rangbah ka jingim ialehkai ba dain un ioh ban khyrwit jam ia ka bol kaban pynkhih hi ir ia ka jar.
Hadien kane ka shi kol, ka Nongkseh SSCC ka la iai bteng ba kan kham nion shakhmat ia la ka rukom ialehkai ka jong ka, ha kaba sa kiwei pat ki player kum ki jong u Shano Tariang, Chesterpaul Lyngdoh ba ka jingpyrshang jong ki ban pynkhih ia ka jar kila shu lait salit.
Haba wan ban bteng ia ka kylla miet, ka Khimusniang SC ki la ioh ia ka kabu ksiar ban pynphai ia ka shi kol ba ka la shah tam, hadien ba ka la don ka jingbakla na ki player ki jong ki, kaba hangne u Dawanbiangmi marsien ioh ia ka bol ba un rah shakhmat bad ha ka khyllipmat kaba biang dain ban khyrwit ban pynkhih ir ia ka jar.
Kane ka kol, ka la pynkhih win ia ka stadium ka SSA, ha kaba ki paid nongwan peitkai ruh kim lah shuh ban batai shano kane ka jingiakhun kan lam la kan lam sha kaba iakhaid ne ka Nongkeh SSCC ne ka Khimusniang kiban wanphai bad ka jingjop.
Ha ki kynta ba ka jingiakhun kan khreh ban jam sha kaba kut, u bah Richard Nongneng coach ka Nongkseh SSCC, u la wanrah ia ka jingkylla ha ka kynhun ban bujli lai ngut ki player, ha kaba marsien ia bujli, u Hardycliff Nongbri ha ki minit ba ka jingiakhun kan jam noh sha kaba kut hadien ka por ba la pynjlan ia ka, ba un ioh ban thep ia ka kol kaba ar bad ban wanphai bad ka lai point ba pura.
Ki prokram ialehkai kiban long lashai ka sngi ha ka por 3 baje nohphai sngi ka long :
Group A (Shillong SSA Stadium) – Mawshun SCC vs Umkaber SCC
Group B (Shillong MFA Ground) – Nangkiew Irat SC vs Mulang SC Nongbah
Group C (Amlarem) – Mawlai SC vs Amlarem SC
Group D (Khliehriat) – Thangskai Tiger SC vs Ladthadlaboh SC
Group E (Wahiajer) – Shillong Lajong FC vs Lumphyrnai Sohphoh FC
Group F (Mairang) – No match scheduled
Group G (Williamnagar) – A’chik SCO Rongjeng vs Maram FC
Group H (Mawkyrwat) – Rangdajied United FC vs Mawten SC
