Shillong, Iaiong 15: U chairman ka Green Tech Foundation (GTF) Bah H Bansiewdor Nonglang ula rai ban nym weng satia ia ka jingshah thngan khlem pud hadien ba ka tnat Tourism ka la kyntait ban weng noh ia ka jingiateh kaba kynthup ia u dewlynnong Lumpongdeng ha ka projek Taj Umiam Resort & Spa.
Ia kane ka rai la shim hadien ba ka jingiakynduh bad ka Director ka tnad Tourism Kong BL Pakyntein ka bym shym la ai kano kano ka jingpynthikna ban pynduh pyndam noh ia kane ka projek.
“Mynta ka sngi namar ba ka dei ka sngi kaba hynniew jong ka jingshah thngan khlem pud, u chairman jong ngi ula tlot bor katba nangmih ki sngi. Mynta ka step, ki bor district ki la bthah ia ngi ban iakynduh ia Director ka tnat Tourism ka Kong BL Pakyntein” la ong u secretary general ka GTF u Bah Ritre Lyngdoh.
U Bah Ritre ula bynrap ruh ba ïa ka jingïalang bad ka tnat Tourism la khot ha ka por ba lyngkot khlem da don jingthoh lypa.
“Hynrei kim shym la wan ryngkat bad ka jingthoh jingkular bad hadien ha ka por janmiet ha ka por kumba 4.40 baje janmiet, ngi la ioh ia ka shithi ba kan don ka jingialang kaba la khot da ka Director jong ka tnad Tourism” u la pynpaw.
“Hadien kata ngi la don ka jingialang hapdeng ki dkhot jong ka GTF bad ngi la shim ia ka rai ba ngin leit ban iashim bynta ha ka jingialang bad ka Director,” ula ong.
Haba batai ia ka jingmih, u la ong ba ka tnad Tourism ka dang iai bteng ban kam trai ia u dewlynnong Lumpongdeng.
“Ka jingmih na ka jingialang ka long kaba sngewsih shibun. Ngi la shong la palat 6 sngi da kaba kyrmen baka Sorkar kan shimkhia halor ka jingdawa jong ngi, kata ban pynduh noh ia kane ka projek. Hynrei hadien ba la iathir sani ia bun ki mat khamtam eh ia ka mei mariang, ka tnad Tourism ka la ong ba kan nym weng iaka jingiateh ba u dewlynnong Lumpongdeng un don bynta haka Project Resort bad Spa” ula ong.
Hadien ka jingialang, ka GTF ka la pynbna ba ka jingiakhih kan nang jur.
“Kumta, halor kum kane ka jingmih naka jingialang kaba pynduh jingkyrmen, ka Green Tech Foundation lyngba u chairman ka pynbna ba ka jingshah thngan khlem pud sngi kan dang iaid beit bad ka jingiakhih kumba la pynthikna da ka riti synshar ka ri India kan nang iai bteng ban yn dang pynkhlain shuh shuh,” ula ong.
 Bah H Bansiewdor Nonglang ula rai ban nym weng satia ia ka jingshah thngan khlem pud hadien ba ka tnat Tourism ka la kyntait ban weng noh ia ka jingiateh kaba kynthup ia u dewlynnong Lumpongdeng ha ka projek Taj Umiam Resort & Spa.){kind=link}