Shillong, Jymmang 30 : Ka Langsning FC kala ioh rung ha ka sien ba nyngkong eh sha ka final jong ka Meghalaya State League da kaba beh na ka jingshah thep shi kol ban jop ia ka Shillong Lajong FC da 4-2 kol lyngba ka penalty hadien ba kut ka extra time mar 1-1 kol.
Kine ki artylli ki club kila ai ha ngi ia ka jingialehkai phutbol kaba itynnad tam kaba ngi la iohi ha kane ka MSL 5 haduh mynta, ha kaba ka Lajong kala tam nyngkong lyngba ka kol u Fridison Wanniang ha ka minit ba 21 shuwa ba u nongthep kol ba bun tam ka lympung Nelson Rymbai un pyniakhaid ha ka minit ba 80.
Ym shym la don ba thep kol ha ki 30 minit jong ka extra time hynrei ha ka tiebraker, ka Langsning kala pyneh rngiew ban jop da 4-2 kol hadien ba u nongap kol Nister Roy Suting ula iada ia ka spot kick hashuwa ba u Samchaphrang Lato un lait sharud ia ka lad ba khatduh jong kane ka janmiet.
Ka Langsning kan iakynduh mynta ia ka Nongkseh SSCC, ka ba dang shu ialehkai nyngkong eh ha ka MSL, ha ka final ka ban long ha ka 5 tarik Jylliew bad kane ka mut ruh ba ngin ioh ia ka Champion ba thymmai ne kaba san jong ka Meghalaya State League, kaba dei ka lympung jong ka Meghalaya Football Association da ka jingkyrshan ka Directorate of Sports & Youth Affairs ka Sorkar Jylla.
Ka Nongkseh bad ka Langsning ki don mynta kin ioh ban shongthait katto katne sngi hashuwa jong ka final, ka ban long ruh sa kawei ka jingiakhun ka ban itynnad bha, ka ban lam sha ka jingpynphong painsngiat ia ka Chaimpion ba thymmai jong ka Meghalaya.
