Shillong, Nailar 24 : Ki Pulit ka East Khasi Hills, ki pyntip ba la pynlait noh ia ki 3 ngut ki briew ba shah kem halor ka jingkynnoh nongtuh bad shah pynshitom beain ha ki paidbhur ka shnong 11 Mer, Mylliem, namar ka jingbym don ki nongwan ai jingujor pyrshah ia ki.
Kine ki laingut ki kyrteng u Banshan Kurbah ba 25 snem na Lumkyllang, Mairang, u Albert Marbaniang ba 26 snem na Mawlai Mawtawar bad ka Ibalabet Kharmawlong ba 27 snem na Mawlai Mawtawar.
Kine ki lai ngut kila shah kem ha ki paidbah ka shnong 11 Mer, Mylliem ha ka step Sngi U Blei halor ka jingkynnoh ba ki dei ki nongtuh bad na ki video bala saphriang, la pyni ba ka jingpynshitom ia uwei na kine kiba shah kynnoh, ka long kaba tohmet bha, da kaba shrain da u maw ia ka kti bad ka kjat.
U Superintendent of Police ka East Khasi Hills Bah Vivek Syiem, u pyntip ba ia kine ki lai ngut la leit pynlait im da ki Pulit ka Mawngap Police Station kiba la poi sha katei ka jaka bad la kit ia ki sha Pomlum PHC ban phah sumar ia ki jingmynsaw. U iathuh ba ia kine ki briew la pynlait noh hadien namar ka jingbym don ki nongwan ujor pyrshah ia ki.
U SP u pyntip ba ia ka kali ML05-T.9827 (Maruti Car) la tan noh sha thanad.
Ki Pulit kila register ia ka suo motu case halor kane ka jingshah shoh kine ki laingut bad ha ka jingtohkit, la ioh kem ia arngut kiba lamkhmat ha kane ka jingpynshitom beain kiba kyrteng u Armingson Kharkongor ba ju khot sin u Arming na ka shnong Mylliem Kyndong, 11 mer bad u Pynshaiborlang Kharkongor ba na Mylliem Kyndong, 11 mer.
Ia kine ki arngut la ialam tian bishar sha Iingkashari bad ka jingtohkit mynta kala iaid shakhmat.
U SP u kyntu ia ki paidbah ba kim dei ban shim ia ka ain hala ka jong ka kti bad ban pyntip mardor sha ki Pulit da ka phone ha u nombor 112 lane ban phone sha ki Police Station ha kum kine ki jingjia.
