Nongpoh, Nailar 24 : Ki paidbah ka them Ri-Bhoi kila ai ka jingkyrshan ia ka jingiakhih jong ka seng Khasi Students’ Union (KSU) bad ong ba ka jaidbynriew kan jin dala jah naduh mynno lada kam don ka KSU ban long ka nongiada.
Kane ka sur ki paidbah kala mih ha ka jingiaid sam kot lyngkdop jong ka seng KSU-North Khasi Hills ha kylleng ki jaka jong ka them Ri-Bhoi ha ka sngi Nyngkong, kaba long shibynta ban pynshai ia ki paidbah halor ki 5 tylli ki mat jingdawa bala buh hakhmat ka Sorkar.
Ha Nongpoh, ki dkhot ka KSU kila rung sha ki jaka iew, ban sam ia ki kot lyngkdop sha ki nongleit iew bad ki nongshong iew bad kumjuh ruh ha man ki Ophis treikam ka Sorkar kiba don ha Nongpoh.
Haba iakren bad ki katto katne ki paidbah, ka sur ba mih na ki, ka long ba ki kyrshan ia ka jingiakhih ka KSU bad ong ba ki mat jingdawa jong kane ka Seng ki dei kiba donkam bha bad ki dei na ka bynta ban iada ia ka bha ka miat jong ki paidbah ka Bri Hynniewtrep.
Kila pynpaw ba ka KSU ka dei ka seng kaba la ieng hok shisha na ka bynta ka Jaidbynriew bad ong ba kane ka seng naduh u snem 1978 kala mih ban iada ia ka Jaidbynriew na ka jingshah tyllep ha ki bor bapher bapher, kynthup ki mynder bad ki kam iuhroit jong ki bor Sorkar ia ka hok u paidbah trai ri trai muluk.
Kila pynkynmaw ruh ba lada ym dei ba don ka KSU, ka shnong Mawlai, Jaiaw, Mawprem kin jin da la kylla long ka shnong ki mynder kumba long ka Laban, Pynthor, Nongmensong bad kiwei kiwei.
Ki la pynrem ruh ia ka jingshah kem ki nongialam ka KSU haba dawa ia ka Sorkar ba ka dei ban pynlait noh ia kine ki nong ialam bad ban khot iakren ia ka Seng ban pynbeit ia ki jingeh baroh.
 bad ong ba ka jaidbynriew kan jin dala jah naduh mynno lada kam don ka KSU ban long ka nongiada.){kind=link}