-->

Pep skul khlem da shim shuti ? Ioh show cause, shah sospon bad shah tohkit ki nonghikai skul Aided

Date:

Share post:

Shillong, Naiwieng 20 : Ki nonghikai ha ki skul ba ai jingiarap ka Sorkar ha East Khasi Hills, kiba pep skul khlem da ioh jingmynjur ban shim shuti, kin mad mynta ia ka jingpynshisha kaba lah ban poi sha u pud ka jingweng syndon naka kam, ha kaba la bthah ruh ia ki Managing Committee ki Skul ba kin leh eiei kum ki nongaikam ym ban ap ia ka jingtuklar ka Sorkar.

Ka District School Education Officer (DSEO) I Kharduit, kala pynmih ia ka rukom treikam kaba la kdew shai sha baroh ki SMC jong ki skul secondary bad higher secondary ba ioh jingiarap na ka Sorkar, ba hadien ki jingujor ia ka jingpep skul khlem jingbit jong ki nonghikai khlem da aplai ia ka shuti lane pyntip sha ki Khlieh jong ki jaka pule, ka rukom leh, ka ong ba kala ktah ia ki khynnah skul bad pyndkoh ia ka jingiaid beit ki jingai jinghikai.

Ki jingujor kila wan na ki SMC hadien ba 6,902 ngut ki nonghikai deficit kiba hikai ha ki 2,194 tylli ki skul naduh primary haduh higher secondary, kila shu jah na skul khlem da shim shuti kum shibynta jong ka jingsangeh treikam ba khlem pud, bala pynlong da ka Khasi Jaintia Deficit School Teachers Association (KJDSTA).

Ha ka circular sha ki President bad ki Secretary jong ki SMC ki skul ba iarap ka Sorkar, ka Kong Kharduit kala ong ba ka jingkitkhlieh ban peit ĂŻa ka jingwan trei, ka jingshim shuti, ka jingpeitngor bad ka discipline ka shong ha ki SMC kiba la thung ĂŻa ki nonghikai, bad ba ka grant-in-aid na ka Sorkar kam pynlong ĂŻa kine ki nonghikai kum nongtrei ka Sorkar ne pynkynriah ĂŻa ka jingkitkhlieh jong u nongai kam sha ka jylla.

Kala ong ba ka Sorkar hi kam ju tuklar ia ki kam ban ai jingpynshitom kaba dei hapdeng ka SMC bad ki nonghikai, hynrei namar ki principal bad ki SMC ki la pan jingĂŻarap, ka ophis jong ka, kala phah ĂŻa ka nongmuna jong ka rukom treikam bad ka nongmuna jong ka notice show-cause, ban pynthikna ba baroh kin bud ĂŻa kajuh ka rukom kaba shonghok bad kaba ĂŻahap.

Katkum kane ka rukom treikam, ka jingpyndep ïa ka kam kan sdang da kaba ki principal kin ai ïa ka show-cause notice, kaba kdew ïa ka por ba ki nonghikai ki jah na skul, bad hadien kata, yn aipor hynñiew sngi ïa ki nonghikai ban jubab da ka jingthoh bad yn ailad ruh ïa ki ba kin peit ïa ka attendance record kaba la pynshong nongrim ha ka jingpynmih notice.

Ki principal kin sa bishar ĂŻa ka jubab ryngkat bad ki kot ki sla kiba kyrshan ia ka jingjah na skul, kum ka medical certificate, bad kin pynmih ĂŻa ka hukum da ka jingthiah la ki pdiang ne kyntait ĂŻa ka jubab ryngkat bad ki daw. Lada ym don jubab hapoh ka por ba la ai, ka kam kan nang ĂŻaid shakhmat.

Lada pdiang ĂŻa ka jubab, ka jingbishar kan kut noh, hynrei lada kyntait, ki nonghikai ki lah ban ngat ha ka jingshah sospon da ka hukum lyngba ka jingthoh bad aiti ia ka charge-sheet kaba kdew ĂŻa ki jingkynnoh kiba shai, ki tarik jong ka jingjah na skul bad ka thup jong ki kot ki sla bad ki sakhi kiba la pynshong nongrim. Yn ai shiphew sngi ĂŻa ki nonghikai ban jubab da ka jingthoh ban pynksan iala ka nongrim.

Lada ki nonghikai ki kyntait ĂŻa ki jingkynnoh, ki principal kin thung ĂŻa u/ka nonghikai jong ka skul, uba la kham rangbah ha ka kam ban ĂŻa u/ka nonghikai uba shah kynnoh, kum u enquiry officer, bad un thung sa uwei pat u nonghikai kum u presenting officer ban pyni ĂŻa ka case jong ka skul.

Ha ka por tohkit, ki nonghikai kin ioh ia ki notice ha ka por kaba biang jong kawei pa kawei ka sngi bishar bad yn shah ban jngoh ia ki kot ki sla, , ban cross-examine ĂŻa ki sakhi, ban wanrah ĂŻa ki sakhi bad nongai sakhi jong ki, bad ban ĂŻarap da u nonghikai uba ki jied. Yn buh jingthoh ĂŻa baroh ki jingĂŻakren ha ka jingbishar ka ban soi da kito kiba iadonlang, bad lada ki nonghikai ki pep wat hadien ba ai notice, ka jingbishar ka lah ban iaid beit shakhmat khlem ma ki.

 

Hadien kata, u enquiry officer un sa aiti ĂŻa ka report da ka jingthoh, kaba pynshai ia man la ki jingkynnoh la ki dei kiba la pynshisha ne em ryngkat bad ki daw, bad ia ka copy yn sa ai sha ki nonghikai ba kin ai jubab da ka jingthoh hapoh ka 7 sngi, bad hadien kane, ki principal ki lah ban pynmih ia ka hukum la kin wengkam noh ia kine ki nonghikai lane map ia kine ki nonghikai da ka jingmaham bad weng noh ia ka hukum sospon, hynrei lada ia ki jingkynnoh ym lah ban pynshisha, ia ka jingbishar lah ban pynkut noh bad thung biang ia kine ki nonghikai.

Ki nonghikai kiba shah weng na ka kam ki don hok ban leit kyrpad da ka jingthoh sha u Chairman jong ka SMC hapoh khatsan sngi bad u Chairman, hadien ba u la bishar ĂŻa ki kot ki sla bad ai lad ĂŻa kine ki nonghikai ban pynsngew ĂŻa kaei kaba ki don ban ong hakhmat jong u, yn sa pynmih ia ka hukum kaba don ki daw.

Lada kyntait ĂŻa ka jingkyrpad, ka jingweng na ka kam kan neh bad ka jingshakr jong kine ki nonghikai kan kut noh. Hynrei lada pdiang ĂŻa ka jingkyrpad, u Chairman u lah ban pynkylla noh ĂŻa ka jingweng ne bujli da ka jingshah pynshitom kaba kham jem, kum ka jingmaham, bad thung biang ĂŻa kine ki nonghikai ha ka kam bad ban phah ruh ĂŻa ka copy jong ka final order sha ka DSEO.

Ka kong Kharduit ka la bthah ĂŻa baroh ki SMC ban shimkhia ĂŻa kane ka rukom treikam bad ban leh eiei noh halor ka jingpep skul khlem da ioh jngbit khnang ba ka jingtreikam jong ki skul bad ka jingmyntoi ha ka pule puthi jong ki khynnah kan ym shah ktah.

Share post:

-->
spot_img

Popular

More like this
Related

Iathuh ia ka khana ba pura | Kyrshan ka NPP ia ka CAA hadien ba lait ka Meghalaya, ong u CM ia u Dr...

Shillong, Naiwieng 19 : U Myntri Rangbah Conrad K...

Don ryngkat ka Sorkar bad ki nonghikai deficit hynrei hap khmih bha ba ktah ia ka pla tyngka :CM

Shillong, Naiwieng 20: U Myntri Rangbah ka jylla u...

Pynthikna u CM ban nym hiar shuki u Bah Prestone | Ka Sorkar ka treikam kum ka kynhun

Shillong, Naiwieng 20 : U Myntri Rangbah ka Jylla...

Sngewkhia ka Sorkar Pdeng ia ka jingiaid laitluid-ka jingeh ba hakhmat halor ka MRSSA Bill : CM

Shillong, Naiwieng 20 : Ka Meghalaya Residents Safety and...