Ka Khyndailad Mall kan dep mynta u snem : Dhar
Shillong, Nailar 24: Ka Sorkar Jylla kan pynduna ia ka dor bad kan sa khot noh da ka EOI kaba thymmai na ka bynta ka Polo Shopping Mall hadien ba ka jingkhot kaba kham hashwa ym shim la don mano mano ruh kiban thep, katba ia ka Khyndailad Mall la khmih lynti ba kan sdang treiakm noh hashwa ban kut noh une u snem.
Haba pyntip ia kane hynne ka sngi Nyngkong, u Symbud Myntri Rangbah uba khmih ia ka Tnad Urban Affairs u Bah Sniawbhalang Dhar ula ong, ba ka Polo Project kadei kaba lah pyndep naduh mynno hynrei kala pulom ha kaban treikam bad kam shim la lah ban khring ia kino kino namar ba ka dor kala long kaba la heh palat.
“Ngi lah dep khot ia ka EOI lah laisien hynrei ym shim la don mano mano ruh kiba wan shakhmat, lehse ka lah ban dei namar ka dor kaba la buh kala heh palat. Mynta ngi lah rai ban pynduna noh ia ka dor bad ban khot biang ia ka EOI” ula ong.
U Bah Dhar ula ong, ba ka jingbhah kadei kaba la pynwan ha kata ka dur khnang ba ki briew kiba na jylla kin ioh ban iashimbynta.
“Ngi ngim yn aiti tang ia kawei ka Unit. Ngi ngin ailad ia ki kynhun kiba rit ruh ba kin ioh ia shimbynta. Ngi dang trei ia ka kam halor katei ka bynta” ula ong bad ka bynrap ba ka jingthmu ban tei ia kane ka Mall kadei ban plie lad ia ki trai jylla ba kin iohkam iohjam.
“Ngim lah ban leh ia ki kam khaii hi dalade kum ka sorkar. Ngi lah tei ia ka Mall ban aikam aiajam ia ki trai jylla. Lada ka sorkar ka tei bad ka die hi, shaei ngin ia leit pat” ula ong
Halor ka Khyndailad, ula ong “Ka Mall ha Khyndailad kadei kaba lah jan dep tei artad, lehse hapoh jong une u snem ngin sa lah ban pyntreikam noh ia ka”.
