Shillong, Jylliew 04 : U Myntri Rangbah ka Jylla Conrad K Sangma ha ka sngi Palei, ula kyntu ia u Myntri kam Pohiing ka Ri Amit Shah ban pynthikna ba ki jingai jingmut jong ka Meghalaya kin rung ha ka Constitution (One Hundred and Twenty-Fifth Amendment) Bill, 2019, kaba tyrwa ban pynbun ia ka jingdon ki MDC ha ki lai tylli ki Autonomous District Council (ADC) ka Jylla.
Ha ka dorkhas bala aiti ha u Amit Shah, u Conrad ula ong ba ka Sorkar Jylla “kala bishar bniah bha” ia ka bill bad shim rai ia ka nongrim jong ka hadien ka jingiasyllok kaba janai bha bad ki kynhun bapher bapher bad ki jingialang kiba bun bad ki ADC.
“Ka Sorkar Meghalaya ka kyrpad ia ka Sorkar India ban pynrung ia ki jingai jingmut ha ka The Constitution (One Hundred and Twenty-Fifth Amendment) Bill, 2019,” ong u Conrad.
Haba kyrshan ia ka jingpynheh ia ki Council, u Conrad ula pynpaw ia ka jingbym hun ia ka nombor bala tyrwa da ka Sorkar Pdeng na ka bynta ar na ki lai tylli ki ADC.
Na ka bynta ka Garo Hills Autonomous District Council (GHADC), ka Bill ka tyrwa ban kyntiew ia ka jingdon ki MDC na ka 30 sha ka 42 ngut ba kynthup ia 36 ngut ba jied u paidbah bad 6 ngut ba shu thung hi.
“Ka jingsngew jong ka Sorkar Meghalaya ka long ba ka GHADC ka dei ban kynthup ym palat ia 40 ngut ki dkhot, ia kaba 36 kin dei kiba shah jied ha u paidbah lyngba ka elekshon. U Lat un sa jied ia 4 ngut ki dkhot ha kaba kumba 2 ngut kin dei ki kynthei” ong ka dorkhas.
Na ka bynta ka KHADC, ka Sorkar ka mynjur bad ka jingtyrwa ha ka Bill ban don 40 ngut ki dkhot-36 ngut kiba shah jied ha u paidbah bad 4 ngut kiba shu thung-ha kaba arngut kin dei ki kynthei napdeng kiba shu thung.
Na ka bynta ka JHADC, u Conrad ula tyrwa ban pynkiew tang khyndiat ban ia kaei kaba la pynpaw ha ka Bill. Ka Sorkar Pdeng kala tyrwa 34 ngut ki dkhot-30 ngut kiba shu jied paidbah bad 4 ngut kiba shut hung.
“Ka jingsngew jong ka Sorkar Meghalaya ka long ba na ka bynta ka JHADC, ka jingdon ki MDC dei ban pynkiew sha ka 32 ngut ha kaba 2 ngut kin dei kiba shu thung ia kaba kawei ka shuki kan long sha ki kynthei” ong u Conrad.
“Kane ka jingsngew ban don 32 ngut ki dkhot ha JHADC haba nujor bad mar 40 ha KHADC bad GHADC, ka dei kaba la pyn shong nongrim na ka jingdon paid bad ka jingheh jong ka JHADC, kaba kham rit ban ia ka KHADC bad GHADC” ula ong.
U Conrad ula pynpaw ruh ia ka jingpyrshah ia ka kyndon ba don ha ka Bill ban jied ia ki dkhot jong ki jaidbynriew riewlum ki bym don nongmihkhmat ne Unrepresented Tribe sha ki ADC, haba pynksan ba ka jingbun ki riewlum ha Meghalaya ka long ka jingeh ban ai ia ka bhah.
“Ki don haduh 17 tylli ki riewlum ba hehpah ha Jylla Meghalata bad katto katne ki riewlum kum ki Kuki ruh ki don haduh 37 ki sub-tribe” ula ong.
Ha ka jaka kane, ka Sorkar kala tyrwa ba ia ki dkhot ba shu thung dei ban jied na ki kynhun ba kynthup ia ki academician kiba paw, ki nongialehkai, ki kynthei kiba khlieh ha ka jingpyniaid kam bad ki nongsengkam ba paw lane ki riewshemphang.
 Bill, 2019, kaba tyrwa ban pynbun ia ka jingdon ki MDC ha ki lai tylli ki Autonomous District Council (ADC) ka Jylla.){kind=link}