Shillong, Naitung 08 : Ka Synjuk ki Rangbah Shnong Border Area, kila kyrpad ia u Myntri Rangbah ka Jylla Conrad K Sangma ban pynthikna ba ki 18 tylli ki shnong Khasi kiba hap hapoh ka Raid Nongtung, Hima Khyrim, ki dei ban neh hapoh u pud u sam ka Meghalaya.
Ha ka dorkhas bala aiti ha ka sngi Ba-ar, ka Synjuk kala ong ruh ba ki nongshongshnong jong kine ki shnong kila mad ia shibun ki jingeh namar ka jingbym pyllait ia ka pisa bai tiar hapoh ka Mahatma Gandhi National Rural Employment Guarantee Act (MGNREGA) scheme.
Wat hapdeng shibun bah ka pisa la pyllut, ki nongshongshnong kin dang ban ioh ia ka umbam umdih ha ki thliew iing jong ki lyngba ka Jal Jeevan Mission (JJM) scheme.
Ka Synjuk kala kyrpad ruh ia ka Sorkar ba kan shimkhia mar mar haba iadei bad ka jingpynbha bad maramot ia ki lai tylli ki surok ba kongsan ha ki jaka khappud ba don jingiakajia. Kine ki kynthup ia ka surok na Mawlasnai sha Jatalong, Khyndewso sha Sabuda bad Thadrang sha Khliehumwang.
Ka ong ba ki nongshongshnong kila pan ruh ia ki solar light bad ki battery lyngba ka Chief Minister’s Solar Mission ban weng ia ka jingduna bording elektrik ha ka thain.
Kila kyrpad ruh ban buh la kumno kumno ruh ia artylli ki sub centre ki ban ai ka jingshakri ha ka pang ka shitom ia ki paid nongshongshnong ka thain.
Ka Synjuk kala kyrpad ruh ia u Myntri Rangbah ba un leh eiei noh halor kine ki jingeh kham kloi kat kaba lah, bad pynthikna ba ki nongshongshnong ha ki jaka khappud ki ioh ia ka hok ba dei ban ioh ia ki jingshakri kiba kongsan bad ka roi ka par na ka Sorkar.
