Shillong, Naitung 08 : U Myntri kam bording ka Jylla AT Mondal ha ka sngi Ba-ar, ula pyntip ba ka Sorkar Jylla kala tyrwa ban pynieng ia bun tylli ki Substation ha ki jaka nongkyndong ban lah weng noh ia ka jingeh na ka jingbym ioh bording ba thikna.
Kat kum ka jingong jong u, u Myntri Rangbah ka Jylla Conrad K Sangma, ula mynjur ban ai hapdeng 5-10 tylli ki sub station manla u snem kat kum ka jingidonkam.
U Mondal ula pyntip ia kane haba jubab ia ka jingkylli halor ka jingioh duna bording ha ka thain Sohra.
U Mondal ula kdew ia ka jingdonkam ban kyntiew kyrdan ia ki tiar ki tar bad ka jingpynmih shuh shuh ia ki substation ha ki jaka nongkyndong ban lah weng ia kane ka jingeh.
Ka thong ban pynmih shuh shuh ki substation ka long ban pynduna ia ka jingjrong jong u transmission line, ban pynduna ia ka jingthut bad ia kino kino ki jingeh iba ktah ia ki shnong ki thaw.
U Mondal ula pynshai ruh ba ka rai halor ka bai bording ka dei kaba la shim da ka MeECL lane ki shnat jong ka lem bad ka Central Electricity Regulatory Commission (CERC) bad ka State Electricity Regulatory Commission (SERC).
Ula batai ba ka MeECL lane ki shnat jong ka, ki rai halor ka dor bai bording, ia kaba lah ban buh ia ka mudui sha ka SERC lada don kano kano ka jingeh.
Hynrei u Myntri ula kyntait ban kynthoh ia ka dor bai bording ha Meghalaya bad kiwei ki Jylla da kaba ong ba um da tip bha ia ka dor bai bording na kiwei pat ki Jylla.
