Shillong, Oct 29: U Symbud Myntri Rangbah ka Jylla Bah Sniawbhalang Dhar ula banjur ia ka jingdonkam ban don ia ka Free Trade Agreements (FTAs) ka ban iarap ia ki nongsengkam ka Jylla, ki nongthain jingthain da ki kti, ki karkhana rit ne Micro, Small and Medium Enterprises (MSME) ban ioh ia ki iew kiba thymmai bad ban pyniar ia ka kam khaii ka jongki.
Haba kren ha ka Workshop kaba shi sngi kaba la pynleit jingmut halor ki MSME, u Bah Dhar ula ong, ba kum kine ki prokram kin iarap ia ki nongkhaii ka Jylla ban sngewthuh ia ki lad khaii, ban ioh ia ka jingbtin na ki ophisar sorkar bad ban ithuh ia ki iew na ka bynta ki mar kaba ki pynmih.
“Ki don ki khep ba ngi don ia ki mar, hynrei ngim tip pat shaei ban leit die ia ki ne shaei ban leit. Kine ki Workshop ki plie lad ban don ia ka jingiakren, jingiasyllok bad jingioh jingmut na ka bynta ki nongsengkam ki jong ngi” la ong u Bah Dhar.
Ula pynpaw ruh ia ka jingdonkam ban pynkhlain ia ki jingtei kiba iadei bad ka khaii pateng bad kiwei pat ki ri, khamtam ha kaban don shuh shuh ia ki Land Custom Station ha Dawki, Borsora bad Baghmara.
U Bah Dhar ula ong, da ka jingpynbha ia ki lad pyniasoh bad ia ki jingtei kiba iadei bad ka khaii pateng kan iarap ia ka Jylla Meghalaya ban ioh ia ki iew ki hat ha Bangladesh bad ban pynmih ia ki lad iohkam iohjam. Ula bynrap ba ka jylla kan buddien bad ka Sorkar Pdeng halor ki jingtyrwa kiba dang sahteng ban pyniar ia ki jingtei kiba iadei bad ki kam khaii pateng.
Katkum ka jingong u Bah Dhar, ka jingkhlain ki lad ban khaii pateng kan iarap ha kaban kyntiew ia ka khajna jong ka Sorkar bad thaw beit beit ia ki lad iohkam iohjam. Ula banjur ban don ia ka jingiatreilang hapdeng ki Jylla bad ka Sorkar Pdeng ban iarap ia ki kam khaii pateng ban sngewthuh kham bha ia ki polisi treikam halor ka khaii pateng bad ban pynlong ia ki kabu kiba don sha ka jingroi kaba shisha.
