Shillong, Risaw 29 : U Symbud Myntri Rangbah ba khmih ia ka tnad Transport Bah Sniawbhalang Dhar ha ka sngi Palei ula iathuh ba ka Sorkar kala shong bishar ia ki kynrum kynram kiba mih halor ka Shillong Ropeway Project bad pynpaw ia ka jingkyrmen ba yn sa lah ban pynbeit noh ha ki khyndiat taiew ban wan.
“Ka kynrum kynram kala mih bad ngi na ka Sorkar ngi la shong bishar ia ka kam. Ngi kyrmen ba kan sa beit noh ha kine ki khyndiat sngi, khyndiat taiew ban wan. Ka project ka long kat kum ka ain, ngi la ioh ia baroh ki jingbit na ki tnad kiba dei khmih” ong u Bah Sniawbha.
Ula ong ba kum kine ki kynrum kynram ki dei kiba shipor bad kan shim ia ka por ba pynsngewthuh ia ki paidbah.
“Kum kine ki kam ki ju mih bad leit, wat khuslai yn sa pynbeit ia ki. Hateng hateng ki lah ban shim ia ka por ban pynsngewthuh ia ki paidbah namar ka dei ka project kaba heh. Ngim kyntur ia ka bad ngi la bud ia kawei ka sienjam hadien kawei kat kum ka ain bad u Myntri Rangbah ruh ula pynshai bha ia ka. Shuwa ban mang ia ka, ngi la ioh ia baroh ki jingbit bad hadien kane ngi la khot ia ka tender” ong u Symbud Myntri Rangbah.
U Bah Sniawbha ula pynpaw ruh ba ka Sorkar bad ka District Council kin hap ban iatreilang.
“Ka Sorkar ka tip kumno ban trei bad ka District Council ruh ka trei hala ka jong ka rukom treikamhynrei ngi hap ban iatreilang na ka bynta ka jingmyntoi jong u paidbah” ula ong.
