Dawa ia u Himanta Biswa ban pynkylla ia ka hukum
Shillong, K’lyngkot 03 : Ka Catholic Association of Shillong (CAS) kala kyntu ia ka Ministry of Home Affairs (MHA) ka Sorkar Pdeng ban tuklar haka ban pynsangeh mardor ia ka sienjam jong ka Sorkar Assam ban thombor ia ki paid Khristan kiba don ha Assam.
Ka CAS kala dawa ruh ia u Myntri Rangbah ka Assam Himanta Biswa Sarma ba un pynkylla mardor ia ka hukum kaba bthah ban lum jingtip ia ka jingdon ki Iingmane Khristan ba dang shu mih thymmai, ka jingpynkylla niam bad ki riew niam kiba lamkhmat lada don ka jingpynkylla niam ia ki briew.
Ka Catholic Association of Shillong da ka jingsngewkhia kala pynpaw ia ka jingpyrshah na ka bynta ka Balang Catholic baroh kawei, halor ka shithi bala pynmih bad phah da ka Special Branch (Assam Police) sha ki Deputy Commissioner of Police bad ki Superintendent of Police.
Kat kum ka kyrwoh bala phah da ki Nongkitkam ka CAS, la ong ba kane ka hukum bad ka shithi bala pynmih ha ka 16 tarik Nohprah, 2022, ka don jingiadei bad ka kam pynkylla niam bad ia kane ka shithi la pynshong nongrim na ki artylli ki jingialang bah jong ka Tnad ba long ha ka 2 tarik Naiwieng bad 21 tarik Nohprah 2022.
Ka CAS ka ong ba kaei kaba paw na kane ka shithi , ka jingthmu jong ka Sorkar ka long kaba ima bha khamtam ia ki paid Khristan ba rit paid jong ka Jylla.
Ka CAS kala kdew “Ki hynniew tylli ki jingtip bala pan da ka Tnad (Assam Police) kaba la pynlong sohpdung ia ki Khristan ha ka Jylla da kaba pan jingtip halor ka : Ka jingdon ki Iingmane ba mih thymmai hapoh ka shisnem bala leit, ka jaka bala ai ban tei ia kine ki Iingmane bad ki briew kiba don jingiadei bad kine ki Iingmane, ka jingjia pynkylla niam ha kine ki hynriew snem, ka thup jong ki Iingmane ba don ha Jylla, ki Jaidbynriew, ki jaka bad kiwei kiwei kiba don jingiadei bad ka jingpynkylla niam, ka jingtip jong ki briew ba hakhmat bad ka jingdon ki police case pyrshah ia ki, lada don, ki daw ba hakhmat eh halor ka jingpynkylla niam bad ki jingai jingmut kumno ban tehlakam bad kiwei kiwei”.
Halor kane, ka CAS kala ban jur ba kat kum ka Article 25,26,27 bad 28 jong ka Riti Synshar ka Ri, baroh ki Nongshongshnong ki don ia ka hok ban jied hala ka mon ia ka jingngeit niam.
“Ka shithi ka paw ia ka jingnoh shiliang namar ki don katto katne na ki bor Sorkar kiba thmu ban pynlong sohpdung ia ki paid Khristan da kaba pan ia ki jingtip ki bym I iahap satia. Kane ka sienjam ka paw kum ka jingber bih da ka jingpyrshang ban pyntieng pynsmiej ia ki paid Khristan hapoh ka Jylla” ong ka CAS.
“Namar kata, ka CAS ka dawa ia ka jingtuklar jong ka Sorkar Pdeng lyngba ka Home Ministry ban pynthikna ba kum kine ki sienjam ba thombor ia ki paid Khristan ka dei ban sangeh shisyndon bad ban shim ruh ia ka sienjam ha kaban wanrah ia ka jingiaieid ia burom markylliang” kala bynrap.
Ka CAS kala kyntu ia ka Sorkar Pdeng ba ka dei ban niew kum ka kam ba bha halor ka synniang jong ki Balang Khristan ha ka koit ka khiah, ka pule ka dangle, ka jingkyntiew ia ka ioh ka kot, ka jingpynngeh ia ka deiriti bad kiwei kiwei.
“Ngi kyntu ia ka Sorkar Assam khamtam ia u Myntri Rangbah Himanta Biswa Sarma ba un sngewbha ban pynkylla mardor ia ka hukum bad ban pynthikna ba ki Khristan ha ka Jylla kin iohi pat ia ka jingkyrmen bad jingshaniah ha ka Sorkar bad ba kin don ia ka mynsiem ban ieid iala ka ri bad ki Jylla ba ki don” kala ong.
