“Ka Hima Mylliem kala kylla long ATM jong ki katto katne ngut” : JFK
Shillong, Kyllalyngkot 03: Ka Grand Council of Chiefs of Meghalaya (GCCM) kala phah da ka jingthoh sha u Chief Executive Member (CEM)ka Khasi Hills Autonomous District Council, Bah Titosstarwell Chyne ba dawa ba dei ban pynbeit noh mardor ia ki jingdkoh hapoh ka Mylliem Act 2007; Mylliem Rule 2015, ka Appointment Act 1959 bad ka Appointment Rule 2015 KHADC.
Katkum ka shithi kaba la phah da u Chairman ka GCCM Bah John F Kharshiing sha u CEM ha ka 23 tarik u Nohprah 2022, ula pynpaw ba ka GCCM kala phah bun tylli ki shithi la bun snem sha bun ngut ki CEM, EM Elaka jongka KHADC halor ka ka jingdonkam ban pynbeit kyrkieh ia ki jingdkoh hapoh ka Mylliem Act 2007; Mylliem Rule 2015 bad ka Appointment Act 1959 bad ka Appointment Rule 2015, hynrei haduh kine ki sngi ym iohi ban don kano kano ka jingshimkhia na ki bor KHADC ban pynbeit ia ki jingdkoh kiba bun ha kitei ki Act bad ki Rule kiba long ki daw jong ka jingklumar lut baroh ka synshar khadar naduh u pud u sam, ka jingbymdon Dorbar Shnong, Dorbar Raid bad Dorbar Hima kaba tikna hapoh Hima Mylliem.
“Ka long shisha kaba sngewsih ba kam shym don kano kano ka jingshim khia na ki bor KHADC halor kane ka phang ban pynjanai iaka synshar khaddar haka Hima Mylliem namar ki long kumba baroh ki tip ba ka jingmih baroh na ka Hima Mylliem kila kylla long ka “ATM” tang jong ki katto katne ngut bad dei na kane ka daw da ki phew snem kane ka Hima kaba shong pdeng, ka sah ha ka jingdum bad la shu synshar sah da u Acting Syiem hapoh Hima Mylliem tang namar ka jingmyntoi jong ki katto katne ngut.
“Wat ka jingtohkit kaba thung ka KHADC halor ki kam jyrsieh kila shu sahkut haduh kine ki sngi namar ka jing bym ler ki Aiñ KHADC” ong u Bah John Kharshiing.
Ula pynpaw ba ha kiba bun ki shnong ha kylleng ka Ri Khasi, ki Dorbar shnong ki lum Dorbar Kut Snem, ki ai jingkhien jingdiah, hynrei hapoh ka jingkhmih ka KHADC ka Hima Mylliem pat kim i mon ban ai jingshai.
Haba pynpaw ba ha kiba bun ki Dorbar Shnong, ki Longkmie kila sdang wan shakhmat ban iasnoh ktilang ban synniang lem ha ka imlang sahlang hapoh ka Shnong bad bun ki Dorbar Shnong kila don ia ki Seng Longkmie bad Seng Samla bad ki mih shakhmat ban iada ia ka shnong ha man ki khep ba wan ka jingiakhih lane ka jingklumar khamtam hapoh sor bad khap sor, u Bah John ula ong “Kaba sngewsih ka long ba haduh kine ki sngi, ym don kano kano ka aiñ (legal lawful notification) kaba batai shai ia ka bynta bad ka kam ki longkmie bad ki seng samla ha ki Dorbar Kur, Dorbar Shnong, Dorbar Raid haduh Dorbar Hima”.
Ka Khasi Hills Autonomous District (Appointment and Succession of Syiem, Deputy Syiem, Electors and Rangbah Shnong of Mylliem Shyiemship ) Act 2007 ka dei ban don ka kyndon na ka bynta ka DORBAR THAW AIN HIMA MYLLIEM KABA 200 NGUT tam ne duna, khnang ba ki kam baroh jong ka hima naduh ka Budget haduh ka kaiphod yn ia tai ia kren shwa ha kane ka Dorbar Thaw Ain ka ban ia kynduh shisien saw bnai kaban kynthup ar ngut na man ki 16 Raid na Ri Them na Bhoi bad 90 ngut ki Rangbah Shnong na ka Synjuk ki Rangbah Shnong Hima Mylliem (katkum ka jingheh ka jingdon Rangbah Shnong na ki Raid), 2 ngut nongmihkhmat na ki Seng Longkmie Hima Mylliem bad 2 ngut ki nongmihkhmat na ka Seng Samla Mylliem, 8 ngut (4 longkmie bad 4 Rangbah) ki riewshemphang jong ka Hima Mylliem ban jied da ka Dorbar Hima bad 4 ngut ki Legal Adviser bad kin kynthup lang hapoh kane ka Dorbar Thaw Ain Hima Mylliem. Kane ka Dorbar Thaw Ain ban khlieh da u Syiem kan ai ia ka kaiphod sha ka Dorbar Hima kut snem.
Nalor kane u Bah John ula ai jingmut ba ka Executive Dorbar jong ka Hima Mylliem kam dei ban don tang 11 ngut kaba kynthup tang u Syiem bad ki Myntri, hynrei la donkam ban don lang sa 6 ngut ki nongmihkhmat na ki 16 Dorbar Raid na Ri Them na Bhoi bad la donkam ruh ban don lang kumba 10 ngut ki Rangbah Shnong, 2 ngut nongmihkhmat na ki Seng Longkmie bad 2 ngut ki nongmihkhmat na ka Seng Samla Hima Mylliem, 2 ngut ki Legal Adviser bad 4 ngut ki riewshemphang jong ka Hima Mylliem bad la dei ban batai ba kane ka ED ka dei ban shong dorbar la kumno kumno man ka bnai, bad ki dkhot hangtei kin long da ka pali man ka ar snem (lait u syiem bad u syiem khynnah).
Nalor kane la ai jingmut ba ia ki Elector dei ban kynthup ar ngut na man ki 16 Raid na Ri Them na Bhoi bad 90 ngut ki Rangbah Shnong na ka Synjuk ki Rangbah Shnong Hima Mylliem (katkum ka jingheh ka jingdon Rangbah Shnong na ki Raid), 2 ngut nongmihkhmat na ki Seng Longkmie Hima Mylliem bad 2 ngut ki nongmihkhmat na ka Seng Samla Mylliem, bad 8 ngut (4 longkmie bad 4 Rangbah) ki riewshemphang jong ka Hima Mylliem ban jied da ka Dorbar Hima.
Ka GCCM kala dawa ruh ba u Syiem ym dei ban bat sah iaka kam haduh ban da khlad noh hynrei dei ban buh noh da ka rta shongthait kaban long ia baroh ki nongsynshar Kur, Shnong, Raid bad Hima baroh kin shongthait ynda kila dap 70 snem.
La donkam iaka kyndon ban batai shai ba lada u Syiem bad ka Dorbar Hima Mylliem kim lum ia ka Dorbar kut Snem ha ryngkat bad u khun u hajar ha ka sngi kaba la buh lupa (ka sngi nyngkong, ka taiew nyngkong, jong u bnai khadwei) ki bor KHADC ki dei ban ai jingpynbna lum Dorbar Hima ym ban pynlut por ban ia phah shithi shaneng sharum kadei ban long mardor (automatic) kumba long haba kut ka samoi san snem ha ka synshar Ri India la kadei iaki Myntri Rangbah ne ki CEM.
Ka GCCM kala dawa ruh ba donkam ban bsuh ka kyndon ba baroh ki kam jied Rangbah Shnong yn pyndep hapoh 15 sngi. Lada ha ka MLA bad MP ka don ka kyndon ban pyndep ia ka kam hapoh hynriew balei ym lah ban pyndep ia ki kam jied Rangbah Shnong hapoh 15 sngi, haba thylli ka shuki Rangbah Shnong dei ban pyndep ban jied thymmai ia u Rangbah Shnong hapoh laiphew (30) sngi bad kala dawa ruh ba dei ban pynkylla thymmai noh ia kiwei kiwei de ki mat kiba kongsan.
Ka long kaba donkam ban pynbeit thymmai ia ka Mylliem Act 2007 bad ka Mylliem Rule 2015 khnang ban ioh ban thaw ki lad ban ai bynta lang ia ki longkmie bad ki Seng Samla kum ki khun ki hajar ban ia shim bynta ha ki Dorbar Shnong.
