Nongpoh, K’lyngkot 03: Da ka jingangnud ban sei ïaka sap ka phong jong ki samla kiba ju sngewtynnad ban ñiah thuk thuk haki surok khohruh khohram, ka Ri-Bhoi Motor Sports Club (RBMSC), kala shim ïaka sienjam ba nyngkong ban pynlong ïaka jingïakop 1st RBMSC Motorcross Challenge 2023 haka 20 bad 21 tarik mynta u bnai ha madan Kurkalang.
Haba kren sha ki lad pathai khubor naka liang u Bah Lance Shadap President, haka jingdonlang u Aiban Sylliang General Secretary, bad kiwei ki dkhot kila pynpaw ba katei ka jingïakop kadei kaba nyngkong eh ha Ri-Bhoi, ba kum ka kynhun kala rai ban pynlong naka bynta ban pynpaw pyrthei ïaka sap ka phong ki khun samla kynthei bad shynrang kiba sngewtynnad ban ñiah thuk thuk.
Kila pyntip ruh ba kan don ka khusnam kaba 2 lakh tyngka ryngkat ka trophy haki jingïakop bapher bapher naduh ka Expert, Novice, 2 Stroke, Scooty bad kan don ruh ka jingïakop ba kyrpang naka bynta ki kynthei (Female Class) bad Ri-Bhoi Class.
Kumta naka liang katei ka kynhun ka khot bad wer ïaki paidbah khamtam ki khun samla kiba ju sngewtynnad ban pynher thuk thuk haki surok khohruh khohram ba kin ban ïashim bynta ha katei ka jingïakop khnang ba katei ka lympung kan long kaba jop.
