Shillong, Risaw 10: Haba kyntait ia ka jubab jong ka tnad pule puthi halor ki mat jingdawa, ki nonghikai hapoh ka shatri Khasi Jaintia Deficit School Teachers Association (KJDSTA) kila ong ba kin pyniaid shakhmat da ki prokram jingiakhih lada ym lah ban pynbeit mardor iaki mat jingdawa.
U president ka KJDSTA Bah Bosswell Pala u la ong ba ka jubab ba la soi da u Joint Secretary Bah D Lyngdoh, la ioh pdiang ha ka por 9 baje mynmiet jong ka 8 tarik Risaw lyngba ka WhatsApp Account jong u Vijay Kumar Mantri kaba dei ruh ka jubab halor ka dorkhas ba la ai lang da ka KJDSTA bad ka GHDSTEA ha u Myntri Rangbah ka Jylla ha ka 25 tarik Nailar.
Da kaba shim baka jubab ka pynduh jingkyrmen, u Bah Boswell u la ong ba ym lah ban tip hapoh ka bor jongno la pynmih ia ka jubab bad u la kynnoh ba ka pyni ia ka jingbym shimkhia ia ka jingeh jong ki nonghikai.
” Ka shithi ka thew ia ka jingpyrshang ban thombor da ka Sorkar ban pyntreikam iaka skhim 2026 kaba ngi la kyntait katkum ki ain bad kiwei kiwei ki daw ba kyrshan daki kot ki sla,” u la ong.
U Bah Boswell ula kynnoh ba ka sorkar ka dang shaniah ha u ophisar uba pyndonkam bakla ia ki mat kiba iadei bad ki nonghikai deficit.
“Une u dei uwei u briew uba ngi shem jingeh ban shaniah ha ki ktien bad ki hukum jong u. Phi tip ia kaei kaba ka jingshah thok ka lah ban leh ia u briew,” la ong u Bah Boswell.
U Bah Boswell ula ong ba katba ka sorkar ka shim ia ka burom ban ailad ia ki nonghikai ba la shongthait ban sei ia ka pisa ba ki la lum na ka Central SBI account kaba mut ban pynmih ia ka bai bam tymmen, kito ki nonghikai ki shah pynbor ban sei khlem sut namar ka jingeh ha ka liang ka pisa tyngka kaba la thaw da ka sorkar hi.
Halor ka Board of Trustees, u bah Boswell u la ong ba ka jingdawa jong ki ban wanrah biang ia la ka jong ka BOT ka la shah kyntait.
“Ngim kwah ban don bynta eiei bad ka board of trustees jong kiwei pat ki briew. Ka Scheme 2026 bad ka jingpynkylla beain ia ka BOT bad ka jingpynslem ban khein ia ka pisa jong ngi ha ka Central account kam dei kaei kaei hynrei ka dei ka kam thok,” u la ong.
U la ong ba ka jubab ka khlem kren eiei halor ka jingpyndep ia ka Centralized Provident Fund na ka bynta ki nongshah thungkam shwa u bnai Iaiong 2010 bad ka skhim penshon ba la batai thymmai, bad ha ka New Defined Contribution Pension Scheme jong u bnai Nailar 2026, watla ka la iehnoh ia ki katto katne ki hukum jong ka iingbishar kiba don nongrim bha.
U Bah Boswell u la ong ba tang kawei kaba bha ka long ka jingpynthikna ba yn nym pynduh noh ïa ki kam deficit, hynrei da ki kot ki sla kiba ïadei bad ki bym pat weng noh, ka jingbym thikna ka dang sah na ka bynta ki nonghikai kiba dang shakri bad kiba kwah ban long nonghikai.
U la kynthoh ruh ia ka jingkdew jong ka sorkar ia ka jingduhnong jong ki khynnah skul lada ki nonghikai ki iakhih da kaba khot ia kane kum ka jingpyrshang ban ialam bakla
“Ngim pan tang ban pynkiew ia ka tulop jong ngi, hynrei ngi pan na ka sorkar ba kan ai ia ngi ia kaei kaba ngi dei ban ioh, ban ym pynslem bad ban ym iaid lait. Bad sngewbha Sorkar, wat thaw ia ki jingiathuhkhana thok ban pynmong ia ngi” ula ong.
