Shillong, Risaw 10: U Nongialam ka Liang Pyrshah bad u Myntri Rangbah barim ka jylla u Mukul Sangma ha ka sngi Thohdieng, ula ong, ka lad ban ioh ia ka jingbishar kaba hok kala kylla long kaba rembor bha bad ka bym kot bor shuh shuh na ka bynta ki riewpaidbah bad ula iawer ia ki bor synshar ba kidei ban wanrah ia ki jingkylla kynthup ia ki iingbishar ne ka Judiciary.
“Ngi dei beit ban sngewthuh ba kiba shah niewbeiñ bunsien hi kidei kiba tlot bad kiba nongleh beiñ kidei beit kiba khlain bor. Kumta ha kane ka rukom treikam kaba ngi don, ka bor jong ka jingai ia ka jingbishar kaba hok ruh kadei ban don ia ka jingkylla” la ong u Sangma.
Ula ong ka jingwanrah ia ki jingkylla ia ka jaka treikam dei ban kynthuplang ia ki iingbishar bad ka pynkynmaw ia ki por ha ka jylla ba kala pyniakhlad ia ka bor synshar bad ia ki iingbishar.
“Kadei ban don, ngi kren shaphang ka jingwanrah ia ki jingkylla ia ki jaka treikam bad ka jingwanrah ia ki jingkylla ia ki jaka treikam ka kynthup ruh ia ki iingbishar. Dei na kane la phiah noh la ka jong, ia ka bor synshar na ki iingbishar bad ka Meghalaya kadei kawei napdeng ki jylla kaba sted tam ban pyndep ia kane ka bynta baroh kawei jong ka jingphiah ia ka bor jong ka kam synshar bad ki iingbishar. Balei? Namar ba ngi angnud ba ngin leh ia kaei kaba ngi ialap bad ngi lah pyni ruh ia kane da ka kam” ula ong.
U Sangma ula ong, ba wat hapdeng jong ka jingwanrah ia ki jingkylla, hynrei ka jingai ia ka jingbishar kaba hok kam shim la lah pat ban poi sha kiba bun.
“Kumta ka jingwanrah ia ki jingkylla ia ki jaka treikam kiba lah dep leh, mynta da ka jingiaid baroh jong ka rukom treikam, kala pawshai ba ka lad ban ioh ia ka bishar kala long kaba lah remdor bad kylla ruh kum ka bym lah ban kot bor shuh. Kumta ki jingwanrah ia ki jingkylla kiba heh ki long kiba donkam bha” ula ong.
Ula iawer ruh ia ka jingdonkam ban don ia ka jingiatai kaba iar ha kylleng ki jylla bad ha ka ri.
“Ia kane hap ban iakren bad iatai ha kylleng ki jylla bad ha kylleng ka ri bad ngi dei ban pynmih eiei na ka, kaban lah ban pynlong ban ioh ia ka lad sha ka iingbishar kaba hok na ka bynta ki riewpaitbah” la bynrap u Sangma.
