Shillong, Naitung 10 : Ka Meghalaya High Court ha ka sngi Thohdieng, kala pynwai noh ia ka mukotduma bala mudui da ki saw ngut ki nonghikai deficit na West Garo Hills, kiba dawa ban siew ia ka sut halor ka jingpynslem ban siew ia ka Death-cum Retirement Gratuity (DCRG) bala pynheh thymmai.
Haba bishar ia ka mukotduma, u Justice HS Thangkhiew ula ong ba ym don satia ka sut kaba hap ban siew namar ia ka DCRG bala pynheh, la pynllait mardor tang mar syn mang ia ka pisa.
Ki nongmudui- Hassain Ali Sarkar, Abdul Wahah Miah, Kanchon Begum bad Rahim Ali- kila dep ioh teng ia ka pisa ba mar T.3.5 lak ha ka dor jong ka DCRG kaba rim.
Hadien bala kyntiew ia ka jingsiew sha ki Nonghikai ba ioh jingiarap na ka Sorkar sha ka T.10 lak, da ka jingmynjur ha ka 19.03.2025, la siew ia ka pisa kaba sah mar T.6.5 lak ha ka 28.01.2026.
Ka Iing kashari ka ong ba naba ia ka jingsiew la leh kat kum ka jingmang pisa ba 28.01.2026 khlem ka jingpynslem, “ym don sut satia ban hap siew”.
Namar ata, ia kine ki mudui la pynwai noh.
