Shillong, Risaw 29 : U Chief Secretary Dr Shakil P Ahammed ha ka sngi Palei, ula bthah ia ki Ophisar ba kin pynthikna ia ka jinglum khana samari 2027 ba 100% khamtam ha ki shnong kiba don sha kyndong eh jong ka Jylla.
“Ngi dei ban pynthikna ba man ki nongshongshnong ki dei ban shah khein lang. Ki briew kiba im ha ki jaka ba kyndong kynthup ka Baghmara, Dalu bad Ranikor ki dei ban shah kynthup” ong u Ahammed ha ka State Level Training Conference on Phase-II (Population Enumeration) of Census 2027 ba pynlong ha State Guest House, Taraghar.
Ula pynpaw ba ka jingkhein kaba bniah halor ka jingdon ki nongshongshnong ka long kaba kongsan bha na ka bynta ka roi ka par kaba kynthup lang bad ka jinglah ban pyntreikam bha ia ki skhim ai jing iarap jong ka Sorkar.
“Ka khana samari ka kham palat ban ia ka niew khlieh. Ka jingkhein ba lah ban shaniah ka iarap ban lap ia ki jingduna ha ka liang ki lad sumar ia ka koit ka khiah, ka pule dangle, ki lad ai jingiarap, ka jing pyniasoh surok bad ki jingtei na ka bynta ki kor digital. Kan kyrshan ia ka Meghalaya Vision 2032 bad ka jingkiew ha ka SDG” ula ong.
Haba maham pyrshah ia ka jingieh briew, u Chief Secretary ula ong ba ki jingkhein ki bym long pura kin pynduh ia ka jingshakri jong ka Sorkar ia ki nongshongshnong kiba don ha ki jingeh.
Ula pynpaw ruh ba ki jingkhein jong ka khana samari kan iarap shibun shah ia ka lynti iaid jong ka Jylla ha kaban kyntiew ia ka ioh ka kot.
“Kum kine ki jingtip ki long kiba kongsan ia ka jingplan halor ka ioh ka kot kaba bun snem bad ban khring ia ka jingkynshew kam ki riew shimet katba ka Jylla ka dang beh ban tei ia ka ioh ka kot ba kot $10 billion bad $16 billion” ong u Ahammed.
Ula ai jingiaroh ia kumba 10,000 ngut ki nongtrei, kynthup ki enumerator, ba kila pyndep ia ki jingleit lum jingkhein ia ki thliew iing.
Ka State Nodal Officer Dr Pooja Pandey kala ong ba ka technology kan nang pynsuk ia ka jinglum jingkhein bad kumjuh ruh kan ai ia ka jingkhein kaba kham beit bad kaba lah ban shaniah.
U Deputy Registrar General Vrushali Abhijit Warade, Office ka RGI, MHA, ula pyntip ba ka Sorkar Pdeng kan sa ai ia ka jingiarap pisa bad ki kor bad batai bniah ia ka rukom leit lum ia ka khana samari u snem 2027.
