Shillong, Jymmang 21 : Ka Iingkashari Meghalaya High Court kala kyntait ban pynsangeh ia ka public hearing halor ka project tih mawshun jong kawei ka kompani dewbilat ha East Jaintia Hills, haba bthah ia ki nongmudui ba kam ba ki pyndonkam ia kane ka jaka ba kin buh ia ki jingmudui pyrshah hakhmat ki borkhmih ha ka 22 tarik Jymmang.
Ka Iingkashari u Justice Bah HS Thangkhiew haba sngap ia ka jingujor bala mudui da u Bunlangki Sukhlain bad 60 kiwei pat, ka onng ba kane ka kam ka dang don ha ka jingsdang bad kam dawa satia ia ka jingtuklar.
“Baroh ki kam ki dang don ha ka khep ka jingsdang namar kat kum ka public notice ba 17-04-2026, kala khot ia ka public hearing, ha kaba ki nongmudui bad kiwei ki trai jaka ki long kiba laitluid ban ban leit iashimbynta da kaba wanrah ia ki jingpyrshah, kat kaba ki don” ong u Advocate General A Kumar hakhmat ka Iingkashari.
Ki nongmudui kila pyrshah ia ka jingtih mawshun ha Lum Syrman, Nongkhlieh Elaka, haba kam ba kane ka jaka ka dei kaba ki pyndonkam bad iashong iasah.
U nongiasaid jong ki TL Lyngwa ula iasaid ba ka Executive Summary da u nongwanrah ia ka project ula pyni bakla ia ka jaka.
“Ula pynpaw ha ka Executive Summary, lah pyni bakla ba ka jaka kaba la pan jingbit ban tih mawshun ka dei ka jaka ba shu ieh shrah” ong ka hukum.
U Jyrwa ula kyrpad ia ka Iingkasahri ban pynsangeh ia ka hearing da kaba kynthoh ba “ka hok jong ki nongmudui kan sa shah ktah jur bha”.
U AD ula kdew ia ka hukum barim ba 16 tarik Nohprah 2025, ha ka WP(C) No. 684 of 2025, ha kaba ka Iingkashari kala kyntait ia ka mudui pyrshah ia ka public hearing jong kane ka juh ka project kaba la buh ha ka 19 tarik Nohprah 2025.
U Senior counsel Dr. N. Mozika, ba mihkhmat ia u nongshah mudui No. 5, ula ong “ Ki nongmudui ki don ia ka jinglaitluid ban wanrah ia kat kaba don ki jingpyrshah ha ka por ba pynlong ia ka public hearing ka ba la buh ban long ha ka 22 tarik Jymmang 2026”.
Haba pynpaw baka Meghalaya State Pollution Control Board ha ka notice ba 17 tarik Iaiong kala khot ia ki jingai jingmut, ki jingkynthoh bad ki jingpyrshah halor kane ka kam ba kadei bad ki kam ba iatakhuh bad ka mariang jong kane ka project” ong ka Iingkasahri ba ki nongmudui ki lah ban rah ia ka kam jaka ha ka hearing.
Ia kane ka mukotduma la buh ban bishar biang ha ka 12 tarik Jylliew, 2026.
